Новы для Беларусі від птушак адзначаны ў мінскіх Шабанах!

ад 12 сакавіка 2019 года

9 сакавіка на сажалцы ў раёне Шабаноў у Мінску была адзначаная палярная чайка – марская птушка, якая рэдка залятае ўглыб сушы.

Назіранне новага для краіны віду зрабіла арнітолаг Ірына Самусенка, сябра Цэнтральнага Савета АПБ.

Полярная чайка

Палярная чайка гняздуецца на скалах на паўночна-ўсходніх узбярэжжах Канады і ў Грэнландыі. Зімуюць птушкі на поўначы Атлантыкі, таксама на Паўночным моры. А вось на Балтыку залятаюць параўнальна рэдка.

Рэдактар сайта “Птушкі штодня”, арнітолаг Дзмітры Вінчэўскі заўважае, што палярная чайка ў Літве адзначалася толькі аднойчы, у 1954 годзе на марскім узбярэжжы, а ў Польшчы ўпершыню адзначаная ў 1974 годзе, з таго часу рэгістравалася 40 разоў, прычым амаль 70 % усіх сустрэч  адбыліся на марскім узбярэжжы ці ў партах і пераважна ўзімку.

 

Ірына Самусенка – загадчыца лабараторыі арніталогіі Навукова-практычнага цэнтра НАН Беларусі па біярэсурсах. У выходныя яна рабіла ўлікі чаек на сталічных вадаёмах, падчас якіх зрабіла сотні фота гэтых птушак. Пераглядаючы ўвечары здымкі, яна заўважыла буйную белую чайку. Эксперты па чайках Заходняй Палеарктыкі ўзгаднілі вызначэнне віду і нават удакладнілі ўзрост птушкі. Палярнай чайцы каля двух гадоў.

Полярная чайка

Хутчэй за ўсё, птушка трапіла да нас разам з моцнымі заходнімі вятрамі, якія былі на мінулым тыдні, — кажа Ірына Самусенка. – Гэты залёт – яшчэ адно сведчанне  кліматычных зменаў. Чайкі – цікавая і вельмі пластычная група птушак, якая ў апошнія дзесяцігоддзі значна эвалюцыянуе, адаптуецца да зменаў ва ўмовах жыцця. Чайкі прызвычаіліся харчавацца на сметніках, прыляцелі ў гарады не ад добрага жыцця. Змяняецца клімат, трансфармуюцца іх натуральныя месцы пражывання. Многія віды пашыраюць арэал, каб знайсці лепшыя ўмовы для гнездавання, гадавання нашчадкаў.

Дзякуючы актыўным назіранням арнітолагаў і бёрдвочараў, толькі за апошнія гады ў Спіс птушак краіны дадаліся камчацкая чайкажоўтаногая чайка і чайка-бургамістр, прычым апошнія два віды ўпершыню адзначаны ў наваколлі Мінску і ў абодвух выпадках рэгістрацыі адбыліся з удзелам Ірыны Самусенка. Палярная чайка – выпадкова залётны від. Наступны раз птушка можа заляцець у Беларусь праз год, а можа і праз 50 гадоў.

Полярная чайка

Калі Беларуская арніта-фаўністычная камісія зацвердзіць гэтую рэгістрацыю палярнай чайкі, від стане 334-м у Спісе птушак Беларусі. Сёння ў Спісе 332 віды, зацвярджэння яшчэ чакае таксама адкрытая 2018 годзе стрынатка-рэмез.

Фота Аляксандра Вінчэўскага



Падзяліся артыкулам у сацсетках:


Сообщить об опечатке

Текст, который будет отправлен нашим редакторам: