Прастыр

Месцазнаходжанне: Брэсцкая вобласць, Пінскі раён.

Каардынаты: 55°46 N 29°15 E

Плошча: 8440 га.

Нацыянальны статус аховы: 3440 га ўваходзяць у склад рэспубліканскага ландшафтнага заказніка “Прастыр”, створанага ў 1994 годзе.

Міжнародны статус аховы: ТВП, (Крытэрыі: А1: вяртлявая чаротаўка, вялікі арлец, драч; В3: пагоніч, малы пагоніч, салаўіны цвыркун).  Рамсарскае ўгоддзе (крытэрыі 1а, 2а).

            ТВП уяўляе сабой буйное нізіннае пойменнае балота у міжрэччы Прыпяці, Прастыра і Стыры. Гэта апошні з тыповых старых куткоў старога Заходняга Палесся, які захаваўся сярод пераўтвораных ландшафтаў. Да нашага часу з-за адсутнасці мастоў праз Прыпяць і Прастыр тут не пракладзена ніводнай дарогі.

На гэтым участку поймы чаргуюцца забалочаныя лугі, нізінныя адкрытыя асаковыя балоты, лазнякі і трысняговыя зараснікі. Сярод забалочаных абшараў, пранізаных сеткай невялікіх азёраў і старыц, раскіданы невялікія ўзвышэнні (астравы). Лясоў практычна няма, за выключэннем невялікіх алешнікаў уздоўж рэк.

            Гідралагічная сетка прадстаўлена рэкамі Прыпяць, Прастыр, Гнілая Прыпяць, Варацец, а таксама шматлікімі пратокамі, каналамі і старычнымі азёрамі. Меліярацыйная сістэма ў межах угоддзя страціла сваё функцыянальнае значэнне. Грунтовыя воды залягаюць на глыбіні 0,1-0,9 м, а на затарфаваных участках выходзяць на паверхню. Паколькі тэрыторыя мае нізкі і плоскі рэльеф, паводка часта затрымліваецца тут на тэрмін да 4  месяцаў, таму мясцоваць моцна забалочана і практычна пазбаўлена лясоў.

            Буйнамасштабная гаспадарчая дзейнасць у межах тэрыторыі не вядзецца. Частка ўгоддзя выкошваецца, у меншай меры тут практыкуецца выпас жывёлы. Тэрыторыя таксама выкарыстоўваецца для палявання, а рэкі, старыцы і пойменныя азёры – для аматарскай рыбнай лоўлі. У заказнік можна трапіць толькі на лодцы, а ў паводку гэтая тэрыторыя практычна недаступная.

Нізіннае балота, якое знаходзіцца ў межах ўгоддзя, з’яўляецца паляўнічай тэрыторыяй глабальна пагражаемага віду птушак – вялікага арляца Aquila clanga. Усяго тут адзначана 113 відаў птушак, 92 з якіх гняздуецца. Тэрыторыя мае важнае значэнне для захавання папуляцый такіх відаў, як вяртлявая чаротаўка Acrocephalus paludicola, драч Crex crex, дубальт Gallinago media, малы арлец Aquila pomarina, вялікі бугай Botaurus stellaris, пугач Bubo bubo, малы пагоніч Porzana parva. У межах угоддзя знаходзіцца дзве калоніі вялікай белай чаплі Egretta alba з агульнай колькасцю каля 30 пар.

            Жывёльны свет ТВП характэрны для пойменных супольніцтваў Палесся. У міжрэччы Прыпяці і Прастыра, а таксама у поймах рэк Гнілая Прыпяць і Стыр канцэнтруецца лось.Тэрыторыя заказніка з’яўляецца месцам летняга прытулку самак з маладняком. Зараз у сувязі з браканьерствам колькасць лася моцна знізілася.

Іхтыяфауна налічвае 23 віды. Аднак, асноўная каштоўнасць пойменных угоддзяў ТВП заключаецца ў тым, што тут знаходзяцца адны з самых буйных у Палескім рэгіёне нерасцілішчы рыб. Герпетафауна адносна бедная. З амфібій тут адзначаны сажалкавая Rana lessonae, азёрная Rana ridibunda і вастрамордая Rana terrestris жабы, а таксама звычайная часночніца Pelobates fuscus. Паўзуны прадстаўлены порсткай яшчаркай Lacerta agilis і звычайным вужом Natrix natrix.

У фларыстычных адносінах тэрыторыя вывучана слаба. Тым не менш, у межах угоддзя выяўлена 3 віды раслін, занесеных у Чырвоную кнігу Рэспублікі Беларусь - сальвінія плаваючая Salvinia natans, гарлачык белы Nymphaea alba і касач сібірскі Iris sibirica.