Сялец
Месцазнаходжанне: Брэсцкая вобласць, Бярозаўскі раён
Каардынаты: 52°58 N 24°91 E
Плошча: 19500 гектараў
Нацыянальны статус аховы: частка тэрыторыі з плошчай 7936 гектараў уваходзіць у біялагічны заказнік рэспубліканскага значэння “Буслаўка”, які быў створаны ў 1990 годзе
Міжнародны статус аховы: ТВП утворана ў 1998 годзе (код – BY011, крытэрыі А1, В2, В3)
Тэрыторыя ўключае вадасховішча “Сялец”, буйнейшы комплекс сажалак аднаймённага рыбгаса (2500 гектараў), і лясы Ружанскай Пушчы, якія прылягаюць да гэтых штучных вадаёмаў з усходняга боку. Па плошчы пераважаюць хвойныя і яловыя лясы, даволі значную частку тэрыторыі займаюць забалочаныя алешнікі, часам сустракаюцца дубравы. Вялікая колькасць паніжэнняў, сухіх грыў, малых рэчак надае лясам Ружанскай Пушчы надзвычайную мазаічнасць. Нізінныя балоты і забалочаныя лугі размешчаны, у асноўным, у поймах рэк. Частка тэрыторыі балот пакрыта драбналессем.
Вадасховішча і сажалкі рыбгаса пабудаваны на месцы буйнага балота ў пойме ракі Ясельда. На вадасховішчы засталося некалькі вялікіх адкрытых астравоў, вусцевая зона моцна зарасла трыснягом. Праз лясны масіў працякаюць дзве невялікія, з вельмі звілістымі рэчышчамі і павольнай плынню, ракі – Хотава і Радагошч. Акрамя іх тэрыторыю дрэніруюць прытокі Хотавы і, у значна меншай ступені, сістэма каналаў, якая была пракладзена 90-110 гадоў таму назад.
Для прамысловага рыбаводства адведзена 25% тэрыторыі, астатняя частка выкарыстоўваецца лясгасам і мясцовымі калгасамі.
На сажалках, дзякуючы наяўнасці вялікіх плошчаў надводнай расліннасці, мноству рыбы і штучных кармоў, склаліся выключна спрыяльныя ўмовы для гнездавання вадаплаўных птушак. Тэрыторыя рыбгаса з’яўляецца месцам гнездавання буйных папуляцый чаплі-бугая Botaurus stellaris, нырка-сівака Aythya ferina, звычайнага рэмеза Remiz pendulinus. У паслягнездавы перыяд тут канцэнтруецца больш за 20000 водна-балотных птушак. Найбольш шматлікімі ў гэты час з’яўляюцца лыска Fulica atra, качка-крыжанка Anas plathyrynchos, вялікі баклан Phalacrocorax carbo, шэрая Ardea cinerea і вялікая белая чаплі Egretta alba.
Спалучэнне сажалак рыбгаса і вялікага ляснога масіву стварае выключна спрыяльныя ўмовы для арлана-белахвоста Haliaeetus albicilla і пугача Bubo bubo. Вялікае значэнне для птушак мае рыбгас і ў перыяд міграцыі. У гэты час на спушчаных сажалках спыняюцца на кармленне тысячныя чароды розных відаў кулікоў, да 20 арланаў-белахвостаў, ад 5 да 15 асобін скапы Pandion haliaetus.
|
|
