Колькі качак зімавала ў Беларусі?

Апошнія навіны,Навіна арганізацыі ад 13 сакавіка 2018 года

Ужо растаюць снег і лёд на вадаёмах, птушкі пачалі вяртацца да нас з выраю – ідзе вясна. Але некаторыя птушкі нават не адляталі ў цёплыя краіны, а заставаліся ў нас зімаваць. Штогод у Беларусі праходзіць “перапіс” вадаплаўных птушак на зімоўцы. Сёлета падчас улікаў налічылі 24897 птушак 27 відаў. Вялікі дзякуй усім удзельнікам!

У студзені ў многіх краінах свету традыцыйна праходзяць зімовыя улікі вадаплаўных і каляводных птушак. У гэты час птушкі канцэнтрыруюцца і іх можна больш-менш дакаладна палічыць і даведацца, у якім стане знаходзяцца розныя віды і папуляцыі. У Беларусі ўлікі ладзяцьі АПБ разам з НПЦ па біярэсурсах НАН Беларусі, да акцыі звычайна далучаюца дзясяткі валанцёраў.

Аксакаўшчына. Улікі вадаплаўных. Фота Святланы Ішчанка

Рэдкасці на зімоўцы

Мы заклікалі ўсіх выйсці да найбліжэйшых незамерзлых вадаёмаў: рэчак, азёраў, ставоў – і пералічыць птушак. Той, хто аднойчы паспрабаваў займацца ўлікамі, звычайна далучаецца і на наступны год: такая птушыная прагулянка вельмі цікавая, а да таго ж дапамагае вучоным і прыродаахоўнікам сабраць патрэбную інфармацыю. Многім хочацца ўгледзець які-небудзь рэдкі від, і некаторым пашанцавала пабачыць зімародка, белую чаплю або вялікую коўру.

Юны арнітолаг Слава Злобіч вельмі пільны: пабачыў зімародка на другім баку Свіслачы! Фота Ірыны Бірынай-Паўлавай

А самымі цікавымі рэдкасцямі сёлета сталі невялічкі кулічок гаршнэп на Гродзеншчыне і марская чайка пасярэдзіне Мінска на Свіслачы. 

Качка-крыжанка на лёдзе. Фота Ірыны Бірынай-Паўлавай

Лідар жа па колькасці на зімоўцы ў нас пастаянны – гэта качка-крыжанка.

Лідары зімоўкі

Максім Нямчынаў, супрацоўнік АПБ

Мы бачым, што сёлета ў параўнанні з мінулым годам лебедзяў на зімоўцы налічылі больш. Па-першае, надвор’е мінулай зімой было раўнейшае, таму ў лебедзяў было больш месцаў зімовак. І некаторыя з гэтых месцаў маглі проста не трапіць пад улік. А ў гэтую зіму да сярэдзіны студзеня было шмат незамерзлай вады, але потым пачаліся маразы, і гэта прымусіла птушак згуртавацца на адкрытых участках вады.Па-другое, сёлета падчас улікаў быў шырэйшы ахоп вадаёмаў, у тым ліку і месцаў зімовак лебедзяў. Вельмі добра, што колькасць удзельнікаў зімовых улікаў вадаплаўных, як і кропак назірання, расце: чым больш анкет мы збярэм, тым больш грунтоўныя вынікі атрымаюцца. Тады птушкі, якія вандруюць паміж зімавальнымі вадаёмамі, не ўхіляцца ад перапісу!

Дзе было найбольш птушак на зімоўцы? Самымі багатымі як па колькасці, так і па відавым  багацці сталі вадаёмы Мінска і Мінскага раёна, дзе  адзначылі 17 відаў. Усяго на гэтых вадаёмах улічылі 7576 птушак. Другое па велічыні скопішча — вадаём-ахаладжальнік ЦЭЦ-5 у Пухавіцкім раёне: тут на адным вадаёме налічылі 5327 асобін чатырох відаў.  А па відавым багацці на другім месцы апынулася возера Лукомльскае: тут налічылі 14 відаў (1326 птушак).

Вынікі зімовых улікаў вадаплаўных у Беларусі за 2018 год

Табліцу з вынікамі ўлікаў можна спампаваць тут.

Дзякуй удзельнікам зімовых улікаў!

Да кампаніі па ўліках вадаплаўных далучыўся 231 чалавек. Мы атрымалі 80 анкет ад 43 аўтараў.

Сярод сёлетніх удзельнікаў улікаў мы разыгралі карысныя і прыемныя падарункі – вызначальнікі гусяў і качак. Лёс паспрыяў Святлане Радзіонавай з Івацэвічаў і Таццяне Каржыцкай з Мінска – віншуем! Дарэчы, Таццяна была і летась, і сёлета самай актыўнай удзельніцай улікаў: яна даслала нам 9 і 14 анкет адпаведна.

Вызначальнік гусепадобных

Чым болей людзей з розных раёнаў краіны  будзе далучацца да ўлікаў, тым больш дакладную інфармацыю аб птушках мы зможам сабраць. Таму, калі сёлета ў цябе не атрымалася далучыцца да акцыі, чакаем цябе ў наступным студзені сярод удзельнікаў “птушынага перапісу”!