Арляняты кажуць дзякуй!

Апошнія навіны,Навіна арганізацыі ад 30 мая 2018 года

Першыя сертыфікаты з падзякай і вызначальнікі птушак адправіліся ратавальнікам арлянятаў. Усяго акцыю па захаванні вялікіх арляцоў, якія знікаюць ва ўсім свеце, на гэты момант падтрымала звыш 30 чалавек.

У Беларусі гняздуецца адна з найбольшых папуляцый гэтага віду ў свеце, і мы адчуваем вялікую адказнасць у справе яе захавання. Ахова месцаў пражывання гэтых птушак дапаможа ім выжыць.

У траўні АПБ правяла ўлікі вялікага арляца ў Бярэзінскім запаведніку. Вынікі радуюць: тут знойдзена 7 тэрыторый гэтага рэдкага віду. Агульная колькасць вялікіх арляцоў для запаведніка ацэньваецца ў 7-10 пар.

Сямён Левы, каардынатар акцыі “Выратуй арляня!”

Адна з тэрыторый месціцца на поўнач ад возера Палік ў пойме Бярэзіны. Гэтая тэрыторыя практычна не даступная для чалавека: шматкіламетровыя забалочаныя чорнавольхавыя лясы з заваламі з аднаго боку, а з другога – зарослая і затопленая пойма Бярэзіны. Шукаць арляца тут было вельмі складана: дабірацца да месца назірання трэба было на лодцы, а стаяць некалькі гадзін з падзорнымі трубамі давялося па калена ў вадзе. Сёлета высокая працяглая паводка. Але вялікі арлец, відаць, адчувае сябе «як дома». Бонусам для ўлікоўшчыкаў сталася першая рэгістрацыя для Бярэзінскага запаведніка рэдкай чырванакніжнай страказы стрэлкі зеленаватай. Гэта 50-ты від стракоз, выяўленых на гэтай прыроднай тэрыторыі пад асаблівай аховай.

Самец стрэлкі зеленаватай. Фота Сямёна Левага

Пра што гэта кажа? Пра тое, што на некранутых лясных, балотных і каляводных тэрыторыях, дзе птушак не турбуе чалавек, вялікія арляцы паспяхова жывуць і размнажаюцца. Таму акцыя “Выратуй арляня!” не проста важная, а неабходная для захавання беларускай папуляцыі птушак.

У межах гэтай акцыі АПБ праверыць ужо вядомыя і выправіцца на пошукі новых месцаў гнездавання вялікіх арляцоў, каб іх узялі пад ахову і птушак нічога не турбавала.

Карына Салавей, кіраўнік аддзела развіцця АПБ

Першыя сертыфікаты лятуць удзельнікам акцыі разам з самымі цёплымі словамі ад АПБ і птушак – дзякуй, што падтрымалі арлоў беларускіх балотаў! Гэта выдатны падарунак дзікай прыродзе. Дарэчы, сертыфікат “Ратавальніка арлянятаў” або “пуцёўка” ў экспедыцыю па пошуку вялікіх арляцоў можа быць цікавым і незабыўным падарункам сябрам ці блізкім на дзень нараджэння ці іншыя святы! Гэта тое, што сапраўды запомніцца і парадуе.

Хочаш дапамагчы беларускім арлам?

Зрабіць гэта лёгка. Зрабіць ахвяраванне можна трыма спосабамі:

• сістэма ЕРИП,
• смс-паведамленне (для абанентаў МТС),
• банкаўскі перавод.

Ахвяраваць можна любую суму! Падрабязней пра тое, як гэта зрабіць.

ВЯЛІКІ ДЗЯКУЙ АД ВЯЛІКАГА АРЛЯЦА

• 20 рублёў – за такое ахвяраванне ты атрымаеш сертыфікат “Ратавальніка арлянятаў”.
• 100 рублёў – за такое ахвяраванне ты атрымаеш кнігу – вызначальнік птушак.
• 200 рублёў — за такое ахвяраванне мы запросім цябе ў сапраўдную экспедыцыю*, дзе разам са спецыялістамі ты будзеш шукаць арліныя гнёзды ў забалочанных лясах Беларусі і зможаш пабачыць вялікіх арляцоў на свае вочы!

Важна: калі ты хочаш зрабіць ахвяраванне, але пры гэтым табе не патрэбныя пералічаныя бонусы, напішы пра гэта на info@ptushki.org 

*Расходы па ўдзеле ў экспедыцыю аплачваюцца ўдзельнікам самастойна.

Мне не ўсё адно!

Раскажы сябрам пра арляцоў і папрасі іх далучыцца да акцыі. Чым больш людзей адгукнецца – тым болей у віда шанцаў выжыць у нашай краіне.

Пішы нам на  info@ptushki.org і дзяліся, чаму і як ты вырашыў дапавагаць арляцам. Магчыма, твой аповед падштурхне іншых звярнуць увагу на праблемы гэтых птушак.

Пазначай свае пасты ў сацсетках хэштэгам #выратуйарляня або #спасиорленка .Так мы ўсе будзем бачыць маштабы акцыі і тых, хто нам дапамагае.

Захаваем разам нашых арлоў!