VOUK.BY – у Топ-10 найлепшых сайтаў! Ці стане ён першым – вызначаеш ты.

Апошнія навіны,Навіна арганізацыі ад 15 чэрвеня 2018 года

Воўчы блог, які вядуць шэрыя драпежнікі Белавежскай пушчы, увайшоў у дзясятку найлепшых сайтаў байнэта. Які з іх самы-самы – вызначыць народнае галасаванне. Падтрымай vouk.by сваім голасам!

Чаму мы стварылі Воўчы блог?

Воўк на слыху ў людзей, і яны думаюць, што ведаюць яго лад жыцця і звычкі. Але часта гэтыя веды аказваюцца стэрэатыпнымі і памылковымі. Мы вырашылі выправіць гэта і паказаць жыццё ваўкоў знутры. Iх уласнымі вачыма і вачыма вучоных-даследчыкаў, што сочаць за нашымі пушчанскімі героямі. Такое сабе воўчае “рэаліці-шоў” – каб было і цікава, і праўдзіва. Чытачы блога атрымліваюць свежыя навіны адразу з Белавежскай пушчы,  у рэжыме анлайн.

Як гэта працуе?

Пяць тамтэйшых ваўкоў, пазначаныя спецыяльнымі ашыйнікамі з датчыкамі, бегаюць, палююць, ядуць, адпачываюць – жывуць сваім воўчым жыццём. Вучоныя атрымліваюць з ашыйнікаў сігналы пра іх перамяшчэнні, а чытачы блога бачаць трэкі ваўкоў на адмысловай карце. Даследчыкі ходзяць па слядах ваўкоў, фіксуюць, чым тыя харчуюцца, дзе адпачываюць, хто з іх адзіночка, а хто бегае ў зграі. Часам нехта з ваўкоў трапляе на камеры-фотапасткі і “посціць сэлфі” ў Воўчы блог.

Што цікавага можна знайсці на Воўчым блогу?

Сачыць за перабежкамі ці дальнімі вандроўкамі ваўкоў неверагодна цікава. Напрыклад, двое шэрых, Руды і Міхась, збеглі за мяжу – у Польшчу і ва Украіну. Адзіная самка — Завея, імя якой далі нашыя чытачы, паказвае, як яе ватага жыве на балотах. Самотны воўк Алесь дае курс самастойнага выжывання ў пушчы. А зусім юны воўк Мікола запрашае паглядзець на сваё логава: ён цяпер зрабіўся старэйшым братам.

Лета – цікавы перыяд у жыцці ваўкоў: яны размнажаюцца, больш перасоўваюцца ўдзень, іх менш пераследуюць паляўнічыя. Табе спадабаецца за імі сачыць!

ПРАГАЛАСАВАЦЬ ЗА ВОЎЧЫ БЛОГ

Воўк не такі страшны, як яго малююць

На Воўчым блогу мы простай мовай тлумачым, чаму больш ваўкоў – не значыць менш аленяў, чаму воўк не нападае на людзей або як распраўсюджваюцца страшылкі пра ваўкоў у СМІ. Многія здзівяцца, калі пачуюць, што гэта не такі страшны звер, як яго малююць, і што сам ён усё часцей робіцца ахвярай неўтаймоўнай прагі паляўнічых забіць “трафейнага” звера.

Сачэнне за гэтымі ваўкамі – частка міжнароднай прыродаахоўнай праграмы ў падтрымку запаведнасці Белавежскай пушчы, якую рэалізуюць грамадская арганізацыя «Ахова птушак Бацькаўшчыны» і Нацыянальны парк «Белавежская пушча» пры падтрымцы Франкфурцкага заалагічнага таварыства (Германія).