Рамонтнікі залілі птушанят ластавак мантажнай пенай

Апошнія навіны,Навіна арганізацыі ад 21 чэрвеня 2018 года

Ганна Мызенка апісала выпадак, калі падчас абнаўлення будынку ў Мінску рамонтнікі залілі гнёзды ластавак мантажнай пенай.

Гарадская ластаўка. Фота Мікалая Вараб’я

19 чэрвеня Ганна напісала ў сваім фэйсбуку:

Некалькі дзён з заміраннем сэрца назірала, як прамысловыя альпіністы мылі сцяну Рэспубліканскага інтэрната ветэранаў вайны і працы. На фасадзе – ластаўчыны гнёзды. Але сцены памылі, і ластаўкі працягнулі залятаць у свае домікі. Я была супакоілася, але цяпер муж заўважыў, што гнёзды залілі мантажнай пенай.

Прамыловы альпініст рамантуе Рэспубліканскі інтэрнат ветэранаў вайны і працы. Фота Ганны Мызенка

Ганна паспрабавала высветліць у аднаго з рамонтнікаў, чыё гэта было распараджэнне, на што хлопец адказаў, маўляў, на фасадзе ластаўчыных гнёздаў быць не павінна. І дадаў, што яны па магчымасці ўсіх птушак з гнёздаў павыганялі.

Ганна працягвае:

“Там былі птушаняты ці яйкі?”, — кажу. Ён кажа:  “У адным былі яйкі…” Ластаўкі цяпер кружляюць ля сцяны… Што рабіць у такой сітуацыі?!

Высветлілася, што працы выконвае УП “Магналіт”, падведамаснае Беларускаму таварыству інвалідаў. Гэтае прадпрыемства выйграла тэндар. Заказчык прац – Рэспубліканскі інтэрнат ветэранаў вайны і працы. Намеснік дырэктара інтэрната, як кажа Ганна, паведаміў, што “працы мусілі выконвацца ў сакавіку, але так атрымалася”.

Мы дазваніліся дырэктару УП “Магналіт” Аляксандру Аляксандравічу Валадзько. Ён расказаў, што двойчы на дзень бывае на аб’екце, але на гнёзды птушак не звяртаў увагі і пра іх знішчэнне сваімі працаўнікамі не ведаў. Як і пра штрафы, якімі яно пагражае прадпрыемству.

Нагадаем, што знішчаць гнёзды забаронена з 16 лютага па 14 ліпеня ўключна. Юрыдычнай асобе за знішчэнне гнёздаў пагражае штраф ад 20 да 500 базавых велічыняў. Плюс кампенсацыя нанесенай шкоды ў адпаведнасці з Указам прэзідэнта  ад 24.06.2008 № 348, у дадзеным выпадку — за кожнае яйка ці птушку з атраду Вераб’інападобных – 6 базавых велічынь.

Што рабіць, калі ўбачыў, як знішчаюць гнёзды?

Калі ты стаў сведкам знішчэння гнёздаў, паведамляць пра гэта трэба адразу ж! Можна пазваніць у Мінпрыроды на гарачую лінію, можна пакінуць электроннае паведамленне на сайце свайго абласнога або Мінскага гарадскога камітэта прыродных рэсурсаў і аховы навакольнага асяроддзя.

Паведамі дату і месца здарэння, пастарайся зрабіць фота ці запісаць відэа. Варта зняць нумар пад’ёмніка і іншых машын, якія выкарыстоўваюцца. Калі магчыма, зафіксуй, колькасць загінулых ці яшчэ жывых птушанят і яек, так як адказнасць будуць нясці за кожную птушку ці яйка. Перапішы ці здымі на фота надпісы людзей у спецвопратцы. Чым больш інфармацыі і доказаў і чым хутчэй ты адрэагуеш, тым лепш.

Кругласуткавы тэлефон дзяжурнага эколага Мінпрыроды: 8 017-267-55-70.

Звяртаемся таксама да кіраўнікоў і супрацоўнікаў прадпрыемстваў ці службаў, якія выразаюць дрэвы ці рэмантуюць фасады: пашкадуйце птушак, заўсёды магчыма знайсці кансэнсус.