Салаўі закрылі спеўны сезон

Апошнія навіны,Навіна арганізацыі ад 16 ліпеня 2018 года

Як прайшоў сёлета сезон салаўіных спеваў? Якая вобласць пачула найбольш салаўёў? Як зрабіць салаўя суседам? Адказваем!

На працягу амаль 2-х месяцаў мы прапаноўвалі пазначаць “сваіх” салаўёў на адмысловай карце.  

Як і летась, сёлета салаўіныя слухачы адзначылі больш за 300 кропак на карце. У гэтым годзе іх было 302, а ў мінулым – 341. Дзякуй за актыўнасць.

Другі год запар рэй па назіраннях салаўёў вядзе Брэсцкая вобласць. Віншуем!

19-20 траўня ў Мінску адбыліся салаўіныя экскурсіі – на Птушыным востраве ў Парку Перамогі і ў Севастопальскім парку. Разам з арнітолагамі мы шукалі і слухалі салаўя ды іншых птушак. Салаўіныя экскурсіі таксама прайшлі ў Гомелі, Слуцку, у Магілёўскай вобласці, у Брэсце і Брэсцкай вобласці.

Калі табе сустрэцца з салаўём не давялося, раім паглядзець відэа Ігара Бышнёва і дакрануцца да лагодных спеваў. 

Навошта заносіць назіранні на карту? АПБ прааналізуе дадзеныя “салаўіных” месцаў і напіша лісты землекарыстальнікам, каб яны ведалі, што ў іх жывуць салаўі, і не пагаршалі ўмовы для сваіх “суседзяў”.

Важна звяртаць увагу на стан гэтых тэрыторый не толькі на працягу акцыі. Мы заклікаем людзей паведамляць пра выпадкі, калі лісце збіраецца ў «салаўіных» месцах! Пачулі салаўя — праверце калі ласка: ці не збіраюць там лісце, ці не выкошваюць траву? Падрабязней пра апалае лісце можна прачытаць тут. 

Да якога часу спяваюць салаўі? 

Звычайна гэтыя птушкі спяваюць, пакуль сямейныя клопаты не пагрукаюцца ў дзверы: тут ужо не да спеваў, час карміць птушанят.  Апошняе назіранне сёлета дададзена 30 чэрвеня. Пра што гэта сведчыць? Хутчэй за ўсё,,наш позні спявак не знайшоў сабе пару ці страціў гняздо, якое было створана. 

Падчас акцыі адно з самых распаўсюджаных пытанняў – як пасябраваць з салаўём і заручыцца яго суседствам? Нагадаем не вельмі складаныя ўмовы, якія павялічваюць шанцы вясенне-летніх вечаровых канцэртаў. 

Як прывабіць салаўя на сваю сядзібу ці побач? 

• Шмат чаго ў гэтай справе залежыць ад мясцовасці. Выдзел павінен быць дастаткова вялікі. Калі побач ёсць рака, канал ці сажалка, то шанцы, што салавей паселіцца, значна ўзрастаюць. Памер гнездавой тэрыторыі ў салаўя – мінімум 50 м2. Лепей за ўсё адвесці яму месца ў куточку ля агароджы.  
• Гэтыя птушкі любяць вільготныя цяністыя месцы з зараслямі бур’яноў і хмызняку. Салаўі гняздуюцца на зямлі, а корм для сябе і птушанят могуць збіраць і вакол гнездавой тэрыторыі.
• З хмызнякоў найлепей пасадзіць каліну, маліны, ажыны, бэз, чаромху, бружмель, бузіну чырвоную, спрацуе і вярба. 
• Калі гушчыня хмызнякоў недастатковая, можна загусціць сухімі галінкамі. Добра, калі гэты хмызняк  часткова зарасце крапівой ды хмелем. Галоўнае, каб на ім не было травы, а толькі высокія травяністыя расліны ды апалае перагнілае лісце на зямлі. Гэты ўчастак павінен быць вільготным. Не залішнім будзе абгарадзіць участак сеткай, гэта будзе добрай аховай ад бадзяжных катоў і сабак. 

Прадказаць з’яўленне гэтай птушкі на ўсе 100% нельга, але бясспрэчна, на ваш дзікі куток завітаюць і іншыя птушкі – малінаўкі, дразды, лескі, чаротаўкі.  Магчыма ты станеш суседам не адной крылатай сям’і!

Дзякуй удзельнікам акцыі «Салаўіныя вечары з АПБ» за актыўнасць і любоў да прыроды і птушак. Да сустрэчы ў новым сезоне салаўіных канцэртаў!