8 верасня — BirdRace-2018: збірай каманду!

Апошнія навіны,Навіна арганізацыі ад 27 ліпеня 2018 года

XV Адкрыты чэмпіянат Беларусі па спартыўнай арніталогіі – BirdaRace-2018 — адбудзецца 8 верасня. Звярні ўвагу, што дату перанеслі на тыдзень пазней.

Пра пачатак прыёму заявак будзе абвешчана ў жніўні.

Што такое Birdrace? Гэта спаборніцтва ў назіранні за птушкамі, у якім удзельнікі цягам 12 гадзін стараюцца знайсці і пабачыць як мага больш відаў птушак. Гонка за птушкамі адбываецца па ўсёй тэрыторыі Беларусі: можна карыстацца любымі транспартнымі сродкамі і, вядома, оптыкай. Таксама можна вызначыць птушку па голасе і залічыць сабе гэты від, але толькі пры ўмове, што ўсе сябры каманды яе пачулі.

Каманда, якая назбірае самую вялікую колькасць відаў, перамагае.

Калі любіш актыўны адпачынак, абавязкова далучайся. Можаш стварыць каманду разам з сябрамі, калегамі або сям’ёй. Але важна, каб як мінімум два чалавекі з каманды былі поўнагадовымі.

Замежныя грамадзяне таксама могуць удзельнічаць, прычым як ва ўласных камандах, так і ў змяшаных беларуска-замежных.

Можна скарыстацца магчымасцю прыляцець у Беларусь без візы і паўдзельнічаць у чэмпіянаце. Тым больш безвізавы рэжым працягнулі да 30 дзён. Запрашай сваіх замежных сяброў далучацца да спаборніцтваў!

Крыху лічбаў. Летась быў усталяваны рэкорд усіх 14-ці чэмпіянатаў: удзельнікі адзначылі 178 відаў. А каманда-пераможца Twix пабачыла рэкордныя 126 відаў.

Каманда TWIX

12-гадзінная гонка за птушкамі — гэта не толькі азартныя спаборніцтвы, але і магчымасць зраіць унёсак у навуку і развіццё беларускай арніталогіі: падчас BirdRace збіраецца ўнікальная інфармацыя пра тэрміны міграцыі і відавы склад. Штогод удзельнікі сустракаюць рэдкія віды птушак. 

Рыхтуйся і ты да цікавых сустрэч з птушкамі ў 2018 годзе. Можа быць, твая каманда зробіць новы рэкорд?  Убачым 8 верасня!