Пачынаецца сезон амаль неабмежаванага палявання

Апошнія навіны,Навіна арганізацыі ад 9 жніўня 2018 года

заканадаўства паляванне

11 жніўня ў Беларусі пачынаецца летне-асенні сезон палявання. Адстрэл дзікіх птушак у нашай краіне не нармуецца паводле колькасці здабычы ні ўвесну, ні ўвосень. Ці патрэбныя такія ліміты?

Летась, калі абмяркоўвалі змены ў Правілы палявання, АПБ прапанавала ўвесці абмежаванні па здабычы птушак у дзень і нас падтрымала Мінпрыроды. Такія нормы здабычы дзейнічалі і ў савецкі час. Але з адкрыццём межаў у Беларусь пацягнуліся замежныя паляўнічыя, якія плацяць за кожную забітую птушку. За кампанію нормы адмянілі і для беларусаў, хаця яны плацяць фіксаваную суму незалежна ад таго, адну ці 20 качак асоба застрэліла.

Качкі-крыжанкі

Ва Украіне, напрыклад, штогод зацвярджаюцца ліміты па здабычы дзічыны паляўнічымі. Зусім нядаўна, у ліпені, Украіна зацвердзіла нормы адстрэлу паляўнічых відаў жывёл на 2018-2019 гады, якія рэгулююць, колькі асобін кожнага віду можа адстрэльваць паляўнічы за дзень палявання.

Напрыклад, за дзень дазваляецца адстраляць 2 вялікія коўры, 3 шэрыя курапаткі, 5 качак, 3 фазаны, 6 лысак, 15 перапёлак, па 10 кулікоў ды галубоў і 3 гусі. Звычайна паляўнічыя палююць 2-3 дні, так што маюць магчымасць здабыць шмат птушак.

Дзічына, узрошчаная пад адстрэл на фермах, не нармуецца.

Мы пацікавіліся ў паляўнічых, ці трэба, на іх думку, увесці такія нормы ў Беларусі – як у вясновы, так і ў асенні сезон палявання. Меркаванні пачулі розныя.

Карыстальнік форума “Трапны стрэл” паляўнічы Андрэй з 35-гадовым стажам лічыць, што ў гэтым няма сэнсу. Па-першае, таму што паляўнічых, на яго думку, засталося мала і шкода папуляцыям невялікая ў параўнанні “з антрапагенным фактарам ўздзеяння на месцы гнездавання”. Па-другое, даводзіць Андрэй, паляванне не кожны раз удалае: бывае, за сезон шанцуе толькі раз. Па-трэцяе, апантаных паляўнічых, якія б’юць вельмі шмат вальдшнэпаў і качароў, зусім мала, “нават не сотні”, і яны ўсё адно не будуць звяртаць увагі на нормы: “Якая праблема размеркаваць норму паміж удзельнікамі? – тлумачыць паляўнічы. – Ці яшчэ горш – скінуць лішняе. Разумная дастатковасць – у душы, а не ў абмежаваннях”.

Паляўнічыя са сваёй здабычай. Ілюстратыўнае фота

Аднак ёсць і паляўнічыя, якія ўвядзенне нормаў адстрэлу лічаць патрэбным. Напрыклад, сэнс у гэтым бачыць Уладзімір, паляўнічы з 16-гадовым стажам з Мінскай вобласці.

Ён нават прыводзіць лічбы магчымых лімітаў: “Дзве шэрыя гусі на паляўнічага ў адзін светлавы дзень, бо гэта мясцовы від. Большасць правільных гусятнікаў, у тым ліку я, не страляюць малаколькасную мясцовую папуляцыю, спадзеючыся на рост. Але хаця б дзве у норме павінна быць, каб абмежаваць паляўнічых ад выпадковай здабычы шэрых гусей. А таксама бывае, калі вяртацца з палявання пустым не хочацца, бо рэдка выбіраешся, і хаця б 1-2 шэрыя гусі закрыюць мінімальныя патрэбы паляўнічага, улічваючы, што падрыхтоўка да самога палявання на гусь дарагая. 8-10 гусей пералётных(белалобая, гусь-гуменніца, белашчокая казарка(хаця яна надзвычай рэдкая на прасторах Беларусі)) на аднаго паляўнічага ў светлавы дзень – больш чым дастаткова.І патлумачу, 8-10 дзікіх гусей на паляўнічага пры кампаніі 2-4 удзельнікі – не такая ўжо частая ўдача: добра, калі з 10 паездак у самых прафесіяналаў (а такіх 10 %) атрымліваецца так настраляцца на 3-4 паляваннях, а ў большасці такіх вынікаў не бывае ўвогуле. Рабіць ліміт на вясновага вальдшнэпа большы за 3-5 асобін не мае сэнсу, а калі раптам праз нейкія прыродныя катаклізмы вальдшнэп будзе цягнуць без асцярожнасці, гэты ліміт спыніць паляўнічых “без тармазоў” ад бяздумнай здабычы. Абмежаванне ў 10 птушак на вясновага качара будзе разумным, гэта больш чым трэба. Але ліміт па малаколькасных відах дзікіх качак мусіць быць 2-3 асобіны, астатняе – самец крыжанкі, бо толькі самец крыжанкі можа вясной актыўна разбураць кладкі качак.

Што датычна асенняга пралёту, 10 птушак любога віду і 5 вальдшнэпаў цалкам хопіць для патрэбаў любога паляўнічага. Большая колькасць ужо выклікае пытанні, ці будзе гэтая здабыча належным чынам апрацаваная і спажытая. Вясновага палявання як на пералётных гусей, так і на мясцовую шэрую гусь, практычна не бывае, хіба што прыемны выпадак. Здабыць увосень 2-5 гусей на 2-3 удзельнікаў лічыцца выдатным вынікам, але бывае такое вельмі рэдка”.

Меркаванні паляўнічых каментуе дырэктар АПБ Аляксандр Вінчэўскі

Казкі пра качароў крыжанкі, якія разбураюць кладкі, чуў толькі ад паляўнічых. Каб яны так рабілі, то від бы даўно знік – і найперш у запаведніках, дзе няма палявання.Адсутнасць нормаў здабычы прыводзіць да спажывецкіх адносін да прыроды — страляю, пакуль ляцяць птушкі, да мноства фотаграфій у Інтэрнеце, дзе ганарлівыя паляўнічыя сядзяць паміж гор забітых гусей і качак. У гэтых людзей няма культуры. Звычайна яна рэгулюе ўсё, што не прапісана ў законах. Таму горы смецця на стаянках паляўнічых пасля адкрыцця сезона палявання, пластыкавыя картрыджы ад патронаў паўсюль, дзе ступіла іх нага, горы забітых птушак у Інтэрнеце – наша рэчаіснасць. І Мінлясгас,на жаль, не бачыць у гэтым праблемы