Маладая Лу́на Палесся: беларусы выбралі імя для ваўчыцы

Апошнія навіны,Навіна арганізацыі ад 12 красавіка 2019 года

30 сакавіка ўдзельнікі і госці канферэнцыі TEDx Minsk 2019 прапанавалі свае варыянты імя для маладой ваўчыцы з Палесся.

Для выбару фінальнага імя было абвешчана галасаванне на сайце праекта vouk.by. Перамог варыянт Луна!

У канцы мінулага года мы, грамадская арганізацыя «Ахова птушак Бацькаўшчыны», пры падтрымцы Франкфурцкага заалагічнага таварыства (Германія) пазначыла GPS-ашыйнікамі двух ваўкоў на Палессі. Імя для аднаго з шэрых герояў праекта выбіралі ўсёй краінай. Але імя ён так і не атрымаў: ваўка застрэлілі за 2 дні да падвядзення вынікаў галасавання.

Луна на фотапастцы

Цяпер у праекце засталася адна маладая ваўчыца. Падчас выступу на канферэнцыі TEDx Minsk 2019 супрацоўніца АПБ Ірына Кашпей папрасіла ўдзельнікаў мерапрыемства прапанаваць імёны для шэрай лясной суседкі. Так былі сабраныя 62 разнастайныя прапановы! Прагаласаваць за найлепшы варыянт можна было на старонцы нашага праекта. АПБ атрымала 278 адказаў. Ваўчыцу прапаноўвалі назваць Тэдзінай, Воляй і нават – Андрэем. Але ўсё ж такі большасць галасоў была за Луну, на другім месцы апынулася Паўліна, а на трэцім – Уршуля (у гонар кафэ, размешчанага ў Нацыянальным акадэмічным тэатры імя Янкі Купалы).

Што мы ведаем пра Луну?

1. Ваўчыца яшчэ зусім маладая. У канцы вясны ёй споўніцца год. Праз круглагадовае паляванне на ваўка, у Беларусі ў шэрых суседзяў працягласць жыцця невялікая: у сярэднім каля чатырох гадоў.
2. Лу́на жыве ў зграі, у якой, як мяркуецца, 4-6 ваўкоў. Хутчэй за ўсё, гэта сям’я: яе бацькі, браты і сёстры.
3. Плошча тэрыторыі зграі 600 км²! Гэта амальудвая больш за плошчу Мінска. Звязана гэта з нізкай шчыльнасцю здабычы. Ваўкам даводзіцца накручваць велізарныя колы, каб знайсці след лася.
4. Сям’я палескай ваўчыцы мае «падвойнае грамадзянства»: беларускае і ўкраінскае. У Беларусі ваўчыца ў бяспецы, таму што не пакідае памежнай паласы, дзе паляванне забароненае. З боку Украіны такіхабмежаванняў на паляванне няма.
5. Што робіць Луна з сям’ёй ва Украіне? Там у іх своеасаблівы стол: жывяцца нашыя ваўкі на сметніку.
6.  Ваўкі сілкуюцца на сметніку? Яны ж драпежнікі! Так, але колькасць капытных жывёл –улюбёнагаласунку ваўкоў – на Альманскіх балотах вельмі нізкая.
7. Луна як маладая ваўчыца любіць гуляць: напрыклад, з гідраўлічным шлангам. Пра гэта АПБ даведаласяў адной з экспедыцый, удзельнікі якой ішлі па слядах ваўчыцы.

Сачы за жыццём Луны і навуковымі даследаваннямі праекта на сайце і на старонках праекта ў сацыяльных сетках у Facebook, Instagram і Укантакце.