Буслы і ластаўкі вярнуліся ў Беларусь! Занось свае назіранні на карту.

Апошнія навіны,Навіна арганізацыі ад 16 красавіка 2019 года

У межах кампаніі «Жывая вясна» мы ўжо атрымалі больш за 500 паведамленняў пра вяртанне ў Беларусь белых буслоў. А 33 чалавекі паспелі ўбачыць і вясковых ластавак!

Часта глядзіш у неба? Ёсць ластаўкі ў тваім наваколлі?

Калі так, то хутчэй занось свае назіранні на сайт: гэта дапаможа зрабіць агульную карту міграцыі нашых птушак!

Першых буслоў сёлета бачылі ў Брэсцкай вобласці. Адсюль і больш за ўсё назіранняў.

Фота з вясновага блога назіранняў springalive.net

А гэтага бусла заўважылі ў Мінскай вобласці, у пошуках ежы прыйшоў на рынак

Буслы на гняздзе. Фота Юрыя Шаўцова

На тэрыторыі нашай краіны вызначаюць тры віды ластавак: гарадскую, вясковую і ластаўку-зямлянку. Вясковыя прылятаюць самымі першымі, за імі – гарадскія.

Вясковая ластаўка. Фота Т. Раманавай

Сябра АПБ, бёрдвочар Стас Верталь расказаў, што ўжо бачыў ластавак на Піншчыне і Століншчыне.

А тым часам першыя фота і відэа ўжо прыходзяць на конкурсы «Жывой Вясны». Спяшайся і ты, час ляціць вельмі хутка! У чэрвені пераможцы атрымаюць каштоўныя падарункі, не застануцца без увагі ўсе ўдзельнікі конкурсаў і тыя, хто актыўна заносіць свае назіранні на карту.

Далучайся да веснавых назіранняў за прыродай і птушкамі разам з «Жывой Вясной»!