У Тураве пройдзе двухдзённы фестываль кулікоў – запрашаем!

Абвестка,Апошнія навіны,Навіна арганізацыі ад 29 красавіка 2019 года

25-26 траўня АПБ ладзіць VIII Фестываль кулікоў у старажытным Тураве. У праграме – чэмпіянат па фотабёрдынгу, бёрдвочынг, канцэрты і шмат забаваў.

Фестываль праводзіцца побач з унікальнай прыроднай тэрыторыяй – Тураўскім балоннем, якое мае статус Тэрыторыі, важнай для птушак міжнароднай значнасці, і з 2008 года абвешчана біялагічным заказнікам. Гэта адно з самых важных месцаў для гнездавання і адпачынку водна-балотных птушак падчас міграцыі ў Еўропе. Побач працуе першая ў Беларусі станцыя кальцавання птушак.

Удзел у фестывалі бясплатны.

Баталён. Фота Віктара Казлоўскага

Што будзе ў праграме?

З пятніцы па нядзелю на беразе Прыпяці будзе адкрыты кемпінг. Можна ўзяць намёт і спальнік, каб начаваць на ўлонні прыроды. Вазьмі з сабой рэпелент ад мошак і вопратку з доўгімі рукавамі. Вогнішча ў кемпінгу можна будзе паліць альбо на агульным месцы, альбо ў сваім мангале.

У абодва дні Фестываля кулікоў пройдуць экскурсіі па горадзе і на станцыю кальцавання, назіранні за птушкамі балоння з арнітолагамі, будзе працаваць фотазона, можна будзе паўдзельнічаць у цікавых спаборніцтвах.

Раніцай у суботу 25 траўня пройдзе чэмпіянат па фотабёрдынгу (хто здыме больш відаў за абмежаваны час) для ўсіх ахвочых. Рыхтуйце фотаапараты з добрым зумам!

Таксама ў гэты дзень вас чакаюць практычная лекцыя ад Цэнтра экалагічных рашэнняў пра асобны збор смецця, запуск паветраных змеяў на Замкавай гары, выступ ля вогнішча на беразе Прыпяці выдатнай паэткі Насты Кудасавай, а таксама Спеўны сход з Сержуком Доўгушавым.

У нядзелю 26 траўня дадаткова адбудуцца фотавыставы “Стары Тураў”, “Палессе ў міжваенны час” С. Хохмана і “Прырода беларускі / She is nature” ад Цэнтра экалагічных рашэнняў ды праекта “Вэтландс”, які фінансуецца Глабальным экалагічным фондам і выконваецца Праграмай развіцця ААН сумесна з Мінпрыроды РБ. У нядзелю для гасцей будзе арганізаваны продаж сувеніраў, будуць праходзіць майстар-класы па вырабе гліняных кулікоў-свісцёлак і кулічкоў з паперы ды воўны, а таксама птушыных прынтоў на торбах. У праграме дня — выступы гуртоў, уключаючы зорак року AKUTE і “РЭХА”.

Фестываль арганізаваны пры падтрымцы Экалагічнага фонду Міхаэля Ота (Environmental Foundation Michael Otto) і Баварскага саюза абароны птушак (LBV).

Спампаваць праграму фестываля

Спампаваць карту фестываля ў вялікім памеры

Аляксандр Вінчэўскі, дырэктар АПБ

На Тураўскім балонні можна сустрэць 33 віды кулікоў! Мы спадзяемся, што на фестывалі разам з дзеткамі вы добра пабавіце час, а таксама навучыся распазнаваць хаця б найбольш яркіх кулікоў Беларусі. Тураў – горад, дзе мусіць пабываць кожны беларус хаця б раз у жыцці. Чаму не ў час фэсту?! Чакаем!

Сачы за абнаўленнямі і падрабязнасцямі праграмы фестывалю на Фэйсбуку і УКантакце!

Запрашаем усіх бацькоў з дзеткамі, турыстаў, аматараў прыроды і актыўнага адпачынку на Фестываль кулікоў у Тураве! Больш падрабязную інфармацыю можна атрымаць па тэлефоне 8029-673-40-36 (Таццяна Яворская).