Птушыныя радасці для Арловых і Арлоўскіх!

Абвестка,Апошнія навіны,Навіна арганізацыі ад 2 мая 2019 года

У гонар птушкі 2019 года — вялікага арляца, якога яшчэ называюць балотным арлом, – мы дорым сёлета бясплатную падпіску на наш бюлетэнь часопіс для Арловых, Арлюкоў, Арляцовых, Арлоўскіх і ўсіх іншых, чыё прозвішча звязанае з арлом.

Калі тваё прозвішча вытворнае ад назвы сёлетняга крылатага сімвалу – проста запоўні форму і чакай у паштовай скрынцы нашыя птушыныя матэрыялы.

Кампанія “Вялікі арлец – птушка 2019 года”

Уладзімер Арлоў

На нашую рассылку падпісаўся вядомы беларускі пісьменнік Уладзімер Арлоў. Мы пацікавіліся, што для яго значыць птушыная сімволіка прозвішча.

«Упэўнены, што маё птушынае прозвішча дапамагае мне ў самых розных справах ад тых часоў, калі быў яшчэ малы. Бацькі часта спасылаліся на прозвішча, каб мяне лепей матываваць. Напрыклад, трэба было выправіць дрэнную адзнаку ў школе: «Ты ж Арлоў, а ў цябе тройка!». Калі баяўся першы раз ляцець на самалёце: «Ты ж Арлоў, а баішся ляцець!»

Пазней я ўзяў гэтую методу сабе на ўзбраенне і казаў ужо сам сабе : «Ты ж Арлоў, значыць павінен быць на вышыні, зрабіць тое або іншае найлепшым чынам». Дарэчы, з сорамам згадваю, што на пачатку заняткаў літаратурай хацеў узяць сабе псеўданім, каб не блыталі з некаторымі іншымі Арловымі. Упэўнены: каб зрабіў так, не здабыў бы сабе столькі чытачоў, колькі маю цяпер.

А яшчэ маё прозвішча натхніла мяне на стварэнне і выкарыстанне дзеяслова «арлець» і вытворных ад яго «паарлець» і  «выарлець» (сэнс, думаю, празрысты).»

Як бачым, арол натхняе і ў штодзённым жыцці, і ў творчасці.

Цудоўная беларуская паэтка Валянціна Аксак (Арлова) напісала верш “Вялікі арлец цікуе за мной”.

Вялікі арлец цікуе за мной

Ну нарэшце 
я ведаю 
як выглядае той, 
чый погляд адчула 
яшчэ да 
нараджэньня сусьвету.
Не сьвідруе вачыма, 
спакойна глядзіць, 
раскашуючы ў сіле сваёй 
і выгоднай пазыцыі, 
з якое нікому ня бачны, 
затое яму 
наўкольле адкрытае 
на ўвесь небакрай. 
Схамянуся, бывала, 
як стрэлам працятая, 
але й небясьпекі нідзе 
ані каліўца 
не запрыкмечу, 
то й віхуруся далей 
у мроях, 
нібы ахінутае 
звышняю мілажальлю 
неразумнае немаўля. 
Але вось цяпер
так раптоўна 
ўзьняла свае вочы 
да макаўкі 
заваконнай вярбіны, 
што ён не пасьпеў 
перакінуцца 
ў тоўсты каравісты сук. 
І мы 
нарэшце глядзім 
адзін на аднога 
ў рыжа-бурых, 
падсьвечаных вохрыстым сонцам, 
вечаровых мярэжах – 
вялікі ўладар-паляўнічы
і зьнячэўленае птушанё, 
якое высьлізвае зноўку 
з ягоных 
кшталцоных вякамі 
й няхібных ніколі 
паветраных ловаў.

А вось што кажа пра сваё прозвішча сябра АПБ Юлія Арлова:

«Мне вельмi падабаецца маё прозвiшча, а таксама тое, што мяне раней часта называлi арлом. Цяпер, калi людзi пытаюць, чаму я так люблю птушкаванне, самi адразу адказваюць на сваё пытанне: “А, ну, вядома, ты ж Арлова!”

Я мару пабачыць нашу птушку года i вельмi чакаю, калi адпраўлюся ў экспедыцыю на яе пошук.»

Юлія Арлова

Калі маеш знаёмых Арловых – раскажы ім пра нашую акцыю і магчымасць падпісацца на паштовую рассылку АПБ з унікальнымі птушынымі матэрыяламі!