Каго страляць не варта: памятка паляўнічаму

Апошнія навіны,Навіна арганізацыі ад 11 жніўня 2019 года

З 10 жніўня па 8 снежня ў Беларусі адкрываецца летне-асенні сезон палявання (фактычна летне-зімовы!) на вадаплаўных птушак: качак, чаротніцу, лыску, вялікую коўру і пастушка. 

З 24 відаў качак, якія сустракаюцца на тэрыторыі нашай краіны, паляванне дазволенае на самцоў дзевяці відаў: качку-крыжанку, качку-свіцьву,  качку-лапаноску, качку-неразню, качку-цыранку, качку-чырку, чубатага нырка, нырка-сівака (толькі ўвосень) і гогаля.

АПБ ніколі не выступала ў цэлым супраць палявання. Яна выступае за ўстойлівае выкарыстанне прыродных рэсурсаў, за разумныя абмежаванні.

Аляксандр Вінчэўскі, дырэктар АПБ

У жніўні-верасні большасць качароў розных відаў качак фарсяць пасля лінькі ў карычневых строях, і нават арнітолагам іх цяжка адрозніць ад самак і маладых птушак. Таму паляўнічым трэба асабліва добра ведаць сілуэты, голас і асаблівасці афарбоўкі качак, каб не застрэлiць ахоўны від і не трапіць на штраф. Не страляйце птушку, калі не ўпэўненыя ў яе відавой прыналежнасці. Інспектарам неабходна не горш за паляўнічых ведаць розныя віды качак і дэталі іх афарбоўкі, бо птушак у руках часам вызначыць не прасцей, чым у полі.

Дасылайце фота здабытых птушак у АПБ на info@ptushki.org ці ў сацсеткі, нашыя спецыялісты дапамогуць вызначыць від, калі неабходна. Фота і іншая інфармацыя пры гэтым не будзе перадавацца трэцім асобам.

Інфармацыю пра кольцы, якімі пазначаныя птушкі, калі ласка, перадавайце ў Беларускі цэнтр кальцавання птушак разам з датай і месцам назірання: bym.minsk@gmail.com. 

Вось што важна помніць паляўнічым.

1) Нырок-сівак (красноголовая чернеть) – глабальна ўразлівы від птушак. З прычыны драматычнага падзення колькасці ён нядаўна ўключаны ў катэгорыю пагражальных Міжнароднага Чырвонага спіса. Прычыны змяншэння колькасці да канца яшчэ не вывучаныя. Таму, нягледзячы на тое, што від у Беларусі дазволены для здабычы ўвосень, мы настойліва просім яго не страляць.

Нырок-сівак (самка). Фота А. Казуліна

Нырок-сівак (самец). Фота Валерыі Трайцяк

2) Качка-чырка (чирок-трескунок) – від, колькасць якога ў Беларусі імкліва скарачаецца. Таму, хоць ён і ўключаны ў спіс паляўнічых відаў, мы рэкамендуем яго не страляць, каб не паскараць гэты працэс яшчэ больш.

Качка-чырка (самка). Фота Ж. Гулеўскага

Качка-чырка (самец). Фота Таццяны Раманавай

3) Качка-шылахвостка (шилохвость) ўключаная ў Чырвоную кнігу Рэспублікі Беларусь, паляваць на яе забаронена. Птушкі маюць зграбны сілуэт, доўгую тонкую шыю і тонкую чорную дзюбу. Звяртайце таксама ўвагу на вузкі доўгі хвост.

Качка-шылахвостка (самка). Фота Shutterstock

Качка-шылахвостка (самец). Фота Taudaha Kathmandu, Wikimedia Commons

Шылахвосткі ў палёце: уверсе самка, ніжэй — самец. Фота Валерыя Кісялёва

4) Белавокі нырок (белоглазая чернеть) таксама ўключана ў нацыянальную Чырвоную кнігу. Птушкі вельмі падобныя да чубатага нырка, дазволенага да здабычы, адрозніваецца ад яго белым падхвосцем (белае вока толькі ў самца), сустракаецца ў асноўным на Брэстчыне. Таму, каб не памыліцца, лепш не страляць і чубатых ныркоў, і птушак, да іх падобных, а засяродзіцца на больш звычайных відах качак.

Белавокі нырок (самка). Фота Shutterstock

Белавокі нырок (самец). Фота Martin Mecnarowski, Wikimedia Commons

5) Паляванне на ўсіх гусей адкрыецца толькі з сярэдзіны верасня.

Шэрая гусь. Фота А. Мізіненкі

6) Качанят, птушанят коўраў і лысак, якія не лятаюць (хлапунцоў) здабываць забаронена згодна 127-му артыкулу Правілаў палявання (Указ Прэзідэнта Рэспублікі Беларусь N 112 ад 21 сакавіка 2018  г.) : “Забараняецца паляванне: … на маладых птушак, якія не лятаюць і (або) ліняюць…”  Не трапляйце на штрафы!