«Перапіс» вадаплаўных на зімоўцы — дапамажы нам падлічыць качак і лебедзяў!

ад 24 студзеня 2020 года

У студзені і лютым пройдуць штогадовыя зімовыя ўлікі вадаплаўных птушак. Дапамажы нам з улікамі!

Учеты водоплавающих птиц на зимовке в Беларуси

Навошта лічыць вадаплаўных?

Улікі праводзяцца, каб ацаніць колькі і якіх відаў гэтых птушак зімуюць у Беларусі. Гэта дазволіць лепш планаваць дзеянні па іх захаванні і на ўзроўні краіны, і на міжнародным узроўні. Зімовыя ўлікі вадаплаўных праводзяцца ў многіх краінах свету і даюць інфармацыю амаль пра 900 відаў птушак.

Улікі птушак – гэта яшчэ і нагода пагуляць на свежым паветры і зрабіць цікавыя назіранні. Праз пацяпленне клімату ўсё больш птушак сустракаюцца на зімоўцы. Летась на зімоўцы налічылі 27387 асобін 32 водных і каляводных відаў птушак. Вынікі ўлікаў можна паглядзець тут.

Калі адбудзецца “птушыны перапіс”?

Да ўлікаў вадаплаўных можна далучыцца на працягу з 24 студзеня па 2 лютага. Нам важна, каб у гэтыя дні на ўлікі выйшла як мага больш людзей. Гэта значна павысіць дакладнасць выніку. А 26 студзеня да ўлікаў могуць далучыцца і ўдзельнікі Чэмпіяната па фотабёрдынгу.

Як праводзіць улік?

Мы падрыхтавалі для цябе памятку па ўліку птушак: як выбраць месца і час для “перапісу”, як правільна запоўніць анкету – адказы на гэта знойдзеш у ёй. Спампуй і карыстайся!

Улікі вадаплаўных ідуць па ўсёй Беларусі. Наведай найбліжэйшы вадаём, палічы, колькі там якіх відаў вадаплаўных і каляводных птушак, ды занясі ўсе дадзеныя ў анкету.

Важна: не падкормлівай вадаплаўных падчас улікаў. Гэта не спрыяе дакладнасці падліку і можа нашкодзіць птушкам. Помні, што хлеб і батон для іх небяспечныя: стрававальная сістэма птушак для такой ежы не прызначаная. Такі корм дае адчуванне сытасці, але не дае дастатковай энергіі і вітамінаў. 

 

Лебедзі на зімоўцы: калі і як дапамагаць?

Карыстайся вызначальнікам птушак guide.florafauna.by або яго мабільнай версіяй. Калі ўсё ж пазнаць від не атрымліваецца, запішы агульную колькасць птушак, сфатаграфуй ці прынамсі апішы невядомыя табе віды і пазнач іх колькасць таксама. Фота можаш даслаць нам на info@ptushki.org або запампаваць на florafauna.by — спецыялісты дапамогуць вызначыць, птушку.

Памятай, што для кожнага ўліку запаўняецца асобная анкета! Напрыклад, калі ты ў адзін дзень будзеш улічваць птушак на рацэ і на возеры, а праз некаторы час правядзеш паўторны ўлік на тым жа возеры, то табе трэба будзе падаць тры анкеты.

Даслаць нам анкету можна ў электронным або папяровым выглядзе.

Дзе шукаць птушак?

У гэтым годзе большасць вадаёмаў не замерзла. Гэта ўскладняе падлікі, таму што вадаплаўныя птушкі не збіраюцца ў месцах, дзе ёсць хуткая плынь або сцёкі цёплай вады, а могуць быць размеркаваныя па ўсіх вадаёмах. Такое становішча дае магчымаць птушкам знайсці болей корму, але дакладна падлічыць іх складана. Таму сёлета знайсці качак, лебедзяў і іншых вадаплаўных птушак магчыма амаль паўсюль.

На што яшчэ звяртаць увагу?

Калі птушак на вадаёме няма ці ён увесь пакрыўся лёдам, таксама пазначай гэта ў анкеце.

Звяртай увагу на акальцаваных птушак і пазначай іх від, нумар кольца, дату і дакладнае месца назірання. Выдатна, калі зможаш зрабіць фота, каб расчытваўся надпіс на кольцы.

Куды дасылаць анкеты?

Анкеты ўліку дасылай у Сакратарыят АПБ не пазней за 9 лютага 2020 года:

  • у электронным выглядзе — на адрас: info@ptushki.org;
  • у папяровым выглядзе — на адрас: ГА «Ахова птушак Бацькаўшчыны», вул. Парніковая, д. 11, пам. 4, 220114, г.Мінск.

Усе ўдзельнікі “птушынага перапісу” атрымаюць поўную інфармацыю пра яго вынікі.

Улікі водна-балотных птушак ладзяць АПБ і Навукова-практычны цэнтр па біярэсурсах Нацыянальнай акадэміі навук Беларусі.

Далучайся да ўліку птушак і заахвочвай сяброў!

Тэкст: Сямён Левы

Телеграм АПБ

 



Падзяліся артыкулам у сацсетках:


Сообщить об опечатке

Текст, который будет отправлен нашим редакторам: