Фестываль кулікоў у Тураве пераносіцца. Як застацца на сувязі з птушкамі?

Апошнія навіны,Навіна арганізацыі ад 1 красавіка 2020 года

У сувязі з пандэміяй мы вымушаныя перанесці Фестываль кулікоў, які планавалася зрабіць у Тураве 1-3 траўня, на 2021 год.

Кулік-чарняк. Фота Дзмітрыя Якубовіча

Спадзяемся, у наступным годзе мы зробім яшчэ круцейшае свята, чым планавалі, а пакуль дзелімся відэаўспамінамі з леташняга свята.

Тураўская станцыя кальцавання працягвае вывучаць і ахоўваць кулікоў, ты можаш падтрымаць яе працу фінансава на краўдфандынг-платформе MolaMola.

Памятай: нават цяпер ты можаш заставацца на сувязі з птушкамі: сацыяльнае дыстанцыянаванне не азначае дыстанцыянавання з дзікай прыродай!

Сойка. Фота: Pixabay

Назірай за птушкамі там, дзе няма або мала людзей: прагуляйся па беразе ракі, па лесе ці ўздоўж поля. Дзяліся сваімі назіраннямі ў сацсетках і тэгай нас. Заставайся на сувязі з аднадумцамі — абмяркоўвай птушак і бёрдвочынг у тэлеграм-чаце «Ціў-ціў!». Вось некалькі парадаў, як птушкаваць падчас пандэміі.

Калі сярод птушак заўважыш (упершыню ў гэтым годзе!) белага бусла, вялікага зуйка, вясковую ластаўку, ластаўку-зямлянку, зязюлю, свіргуля або шчурку-пчалаедку, занось назіранне на карту “Жывой вясны”.

Вясковая ластаўка. Фота Мікалая Вараб’я

Удзельнічай у маніторынгу палявых птушак: ты можаш дапамагчы, нават калі ведаеш усяго некалькі відаў. Напішы каардынатару Сямёну Леваму сваё імя і тэлефон на адрас levy@ptushki.org, у тэме пазнач: “Маніторынг звычайных відаў”. Ты атрымаеш усю неабходную інфармацыю, як узяць удзел у гэтай праграме.

Палявы жаўрук. Фота Мікалая Вараб’я

У вызначэнні птушак табе дапаможа наш мабільны дадатак Ptushki.

Калі ты на каранціне і не выходзіш з дому, вывучай птушак анлайн ды глядзі трансляцыю з двух гнёздаў сокала-пустальгі на сайце “Птушкі штодня”.

Будзь разам з намі, далучайся да АПБ – усім нашым сябрам прыходзіць рассылка з налепкамі, бюлетэнем і часопісам “Птушкі і мы”. Твой голас у падтрымку дзікай прыроды цяпер асабліва важны.