Міёрскі раён атрымае свой брэндбук – прымаем каментары да 8 красавіка

Апошнія навіны,Навіна арганізацыі ад 1 красавіка 2020 года

міёры праект

Самы азёрны раён Беларусі, дзе месціцца старажытнае балота Ельня, варты таго, каб з яго прыродай і гісторыяй пазнаёмілася як мага больш людзей.

Брэндбук распрацаваны ў межах праекта “Разам для грамады і прыроды: узмацненне працэсу развіцця ў Міёрскім раёне праз супрацоўніцтва мясцовай улады і грамадзянскай супольнасці”, які рэалізуецца Міёрскім раённым выканаўчым камітэтам, грамадскай арганізацыяй “Ахова птушак Бацькаўшчыны” і Латвійскім сельскім форумам пры фінансавай падтрымцы Еўрапейскага саюза, прадстаўленага Еўрапейскай камісіяй.

Каб стварыць унікальны вобраз Міёрскага раёна, АПБ замовіла распрацоўку брэндбука. У ім апісанае пазіцыянаванне раёна ў турыстычным кантэксце і распрацаваныя рэкамендацыі па развіцці турызму ў раёне. Таксама ў дакуменце прапанаваная фірмовая айдэнтыка як для раёна ў цэлым, так і для яго важных кампанентаў, такіх як экалагічнае свята “Жураўлі і журавіны Міёрскага краю”, балота Ельня, гарады Міёры і Дзісна, вёска Лявонпаль.

Распрацоўкай брэндбука займалася крэатыўнае агенцтва “Малако”.

Наталля Саракавік, спецыялістка па развіцці турызму

Мы вельмі радыя, што змаглі спрычыніцца да такога важнага і цікавага працэсу. Дзівосная прырода Міёрскага краю натхняе, і таму працаваць над брэндбукам было вельмі здорава. Разам з мясцовымі жыхарамі і крэатыўнай камандай мы распрацавалі ёмістую канцэпцыю і стратэгію, якія дапамогуць раёну паказаць свае моцныя бакі турыстам.

Запрашаем пазнаёміцца з брэндбукам! Свае каментары да 8 красавіка можна даслаць на электронную пошту з пазнакай “Брэндбук”.

СПАМПАВАЦЬ БРЭНДБУК МІЁРСКАГА РАЁНА

Мяркуецца, што брэндбук Міёрскага раёна будзе прыняты ў канцы месяца.