«Выйдзі на сувязь з прыродай!» У беларускіх птушак з’явіліся нумары тэлефонаў

Апошнія навіны,Навіна арганізацыі ад 21 мая 2020 года

галасы птушак крэатыў

Беларусь стала першай краінай у свеце, дзе ў птушак з’явіліся персанальныя нумары тэлефонаў. Пазваніўшы па іх, можна “пагаманіць” з 10 відамі птушак і паслухаць іх спеў. Завесці птушкам “сімкі” мы змаглі дзякуючы кампаніі А1, а саму ідэю для нас распрацавала ініцыятыва “Крэатон”.

Першыя ўласныя нумары з’явіліся ў вялікага голуба, малінаўкі, шчыгла, салаўя, гіля, чорнага дразда, берасцянкі, сіняй сініцы, крапіўніка, шэрай кугакаўкі. Гэта самыя распаўсюджаныя ў Беларусі і самыя пазнавальныя птушкі, якіх можна пабачыць у парках, а часам і наўпрост з акна сваёй кватэры. Многія раней чулі гэтыя галасы, але не ўсе ведалі, каму яны належаць.

Наталля Саракавік, спецыялістка АПБ па акцыях і кампаніях

У Беларусі налічваецца 332 віды птушак, 70 з іх уключаныя ў нацыянальную Чырвоную кнігу. Птушкам патрэбная ўвага, дапамога і абарона. Мы ўпэўненыя, што гэты сервіс будзе нагадваць пра каштоўнасць дзікай прыроды. Больш за тое, такія званкі будуць цікавыя і на ўроках біялогіі ў школах. Каб паказаць, як спяваюць птушкі, настаўнік зможа проста пазваніць ім

Перад тым, як пачуць голас птушкі па тэлефоне, вас павітаюць «птушыныя сакратары».

Імі выступілі акцёры Купалаўскага тэатра Раман Падаляка і Крысціна Дробыш.

“Праект “Выйдзі на сувязь з прыродай” працягвае актыўнасці А1 у сферы экалогіі. Мы лічым вельмі важнымі экасвядомасць і беражлівае стаўленне да прыроды. А званкі птушкам даносяць гэты мэсэдж да беларусаў усіх узростаў у цікавай і захапляльнай форме. Таму мы з радасцю адгукнуліся на прапанову АПБ«, — расказвае кіраўнік аддзела карпаратыўных камунікацый А1 Мікалай Брэдзелеў.

Праект “Выйдзі на сувязь з прыродай” з’явіўся дзякуючы ініцыятыве Крэатон. Яна аб’ядноўвае крэатараў, дызайнераў, менеджараў і стратэгаў, каб дапамагчы сацыяльным ініцыятывам заявіць пра сябе ў грамадстве. АПБ была кліентам чацвёртага Крэатона, на якім каманда крэатыўнага лідара Алега Давыдчыка прапанавала навучыць беларусаў адрозніваць птушак па іх галасах.

“Мы вельмі доўга перабіралі розныя ідэі камандай з шасці чалавек, — расказаў Алег. — Мы зачапіліся за тое, што ўсе птушкі гучаць па-рознаму, і пачалі думаць, як у цікавай форме пазнаёміць з гэтым людзей.”

Як кажа шчыгел? Як спявае малінаўка? Каб пачуць адказ, цяпер дастаткова патэлефанаваць па адным з нумароў: