Рэкорд на кармушках! Вынікі акцыі «Птушкі ля кармушкі — 2021»

Апошнія навіны,Навіна арганізацыі ад 21 студзеня 2021 года

Марозныя дні падчас акцыі АПБ «Птушкі ля кармушкі» прынеслі рэкорды: мы атрымалі 419 анкет, удзельнікі налічылі 14933 птушак на сваіх кармушках!

Усяго ў акцыі паўдзельнічала 1567 чалавек. На іх сталоўкі прыляталі самыя розныя птушкі — адзначана 39 відаў.

Летась на кармушках налічылі 6500 птушак 26 відаў.

Гіль. Фота Ірыны Груздзіловіч

Рэйтынг самых папулярных гасцей птушыных сталовак:

• 1 месца – вялікая сініца (6868 асобінаў)
• 2 месца – палявы верабей (1991 асобінаў)
• 3 месца – дамавы верабей (1837 асобіна)
• 4 месца – зелянушка (785 асобін)
• 5 месца – сіняя сініца (513 асобін)
   

Таксама завітвалі стрынаткі, дразды-піскуны, папаўзні, гілі і амялушкі, сойкі, таўстадзюбы, сініцы-апалонікі, шпакі, шчыглы і нават 6 відаў дзятлаў. 

Юрок. Фота Ірыны Груздзіловіч

Самыя незвычайныя назіранні — юрок і малінаўка, якія рэдка ў нас зімуюць і рэдка прылятаюць на кармушкі.

Птушкі ля кармушкі. Фота Святланы Цэнкер

Поўны спіс відаў можна спампаваць тут.

— Гэты год атрымаўся асаблівым! Такіх птушак у нас яшчэ не было! — кажа кіраўніца клуба АПБ «Крылаты дазор» сярэдняй школы № 9 г. Слуцка Жанна Валетка. — З самай раніцы на велізарным клёне над кармушкамі важна сядзелі гілі. Яны проста пазіравалі дзецям з акна! Гэтак сама пазней паводзіўся дрозд-піскун: увесь час круціўся на галінцы і заміраў, каб яго фатаграфавалі. А на кармушках разгараліся сапраўдныя страсці. Гракі, каўкі, дамавыя і палявыя вераб’і, вялікія сініцы зладзілі сабе спаборніцтва «Хто хутчэй і больш»!

Слуцкія «дазораўцы». Фота Жанны Валетка

— Каб запрасіць пабольш людзей паўдзельнічаць у акцыі, мы звярнуліся да блогераў, — кажа спецыялістка АПБ па сувязях з грамадскасцю Аліса Матавілава. — Мы вельмі ўдзячныя, што яны з радасцю расказалі пра «Птушкі ля кармушкі» сваім падпісчыкам: Канаплёў і Лейдзік, Лера Аўсеева, Ксюша Тырсікава, Леанід Пашкоўскі, спявачка Palina, Алена Урбанская і падарожніца Паліна. Усцешна, што людзі актыўна рэагавалі ў сацсетках і пыталіся, дзе набыць кармушкі. Думаю, крамы з кармушкамі не чакалі такога наплыву:). Спадзяемся, птушачкі будуць радаваць блогераў і іх падпісчыкаў увесь год!

У розыгрышы значыкаў прызёрамі сталі: Паліна Курэц (в. Мікалаеўшчына), Жанна Валетка (Слуцк), Тата Каверына (Гомель), Кацярына Малолава (Чавусы), Арцём Лаўранюк (в. Дыманава), Аляксандра Апацкая (а/г Лошніца), Сяргей Карпушэнкаў (Заслаўе), Марына Аляксеенка (а/г Башні), Ягор Каржанеўскі (Гомель), Алена Баравікова (в. Грабаўка).

Віншуем!

Зіма працягваецца, і мы заклікаем не спыняцца з падкормкай птушак. Калі ў цябе не было часу павесіць кармушку, але з’явілася натхненне — раім звярнуцца да адмысловай падказкі.  Нагадваем, што ўсю зіму можна сачыць анлайн за кармушкай на ўскрайку Белавежскай пушчы — можна пабачыць не толькі птушак, але і звяроў. Стрым працуе ноччу таксама.

Ва ўстойлівыя маразы пры мінус 15 градусах і ніжэй варта падкарміць вадаплаўных птушак зернем, аўсянкай або парэзанай гароднінай, высыпаўшы корм уздоўж берага ля вады.

«Крылатыя дазораўцы» з Жодзіна. Фота Іны Грыневіч

Дзякуй усім удзельнікам акцыі за падтрымку птушак і ўдзел у падліках! Дзяліся сваімі гісторыямі і фота з хэштэгам #птушкілякармушкі ў сацыяльных сетках на працягу зімы. Цікавых назіранняў!

Тэкст: Алеся Башарымава