Маларыта становіцца больш пустальжынай

Апошнія навіны,Навіна арганізацыі ад 30 чэрвеня 2021 года

Ужо перастаў здзіўляць факт, што сокал-пустальга гняздуе ў абласных гарадах і сталіцы Беларусі. Брэст, увогуле, — сакаліны мегаполіс, у якім колькасць пар дайшла да лічбы 60!

Пустальга. Фота Дзяніса Кіцеля

Вентыляцыйныя адтуліны і розныя тэхнічныя выступы ды заглыбленні фасадаў шматпавярховікаў нярэдка нясуць небяспеку для птушак і іх птушанят. Тым не менш, пустальга, здаецца, знайшла сваю нішу ў простым і пераносным сэнсах і заняла ўжо амаль усе даступныя для яе мясціны. Апошнія гады назіраецца тэндэнцыя распаўсюджання сокала ў маленькія гарады і нават вёскі.

Пустальга на гняздзе. Фота Дзяніса Кіцеля

Да таго, як сокалы “акупавалі” гарады, пустальга сялілася на ўскрайках палёў ці ў лесапалосах і займала пустыя гнёзды воранавых птушак. Апошнія гады пустальзе чамусьці надакучыла быць сельскай жыхаркай. Магчыма, ворагаў у гарадах для пустальгі менш, таму і адбылося вялікае перасяленне з палёў у населеныя людзьмі пункты.

У Маларыце пустальга дакладна з’явілася ў 2019 годзе. Пара заняла нішу на пяціпавярховым жылым будынку. Два гады сокалы тут паспяхова выводзілі “нашчадкаў”. У 2020 годзе сябры Брэсцкага абласнога аддзялення АПБ і Рабочай групы па сокалападобных і совападобных (РГСС) усталявалі на тэхнічных паверхах будынкаў штучныя скрыні.

Пустальжаняты ў штучным гнездзішчы. Фота Дзяніса Кіцеля

Вясной гэтага года пустэльгі занялі адну са штучных ніш. Хутчэй за ўсё, сюды перабралася пара, якая гнездавала ў горадзе апошнія два гады. Напэўна, птушак уразілі памеры новай “кватэры”. Большая плошча памяншае рызыкі выпаду птушанят з гнязда да моманту, калі яны самі яго павінны будуць пакінуць.

Кладка пустальгі ў нішы. Белыя яйкі — галубіныя. Фота Дзяніса Кіцеля

Цікава, што першымі нішу аблюбавалі шызыя галубы і нават адклалі яйкі, але пустальга прагнала галубоў і пачала свой гнездавы сезон. На момант праверкі скрыні ў ёй адначасова знаходзіліся яйкі і голуба, і пустальгі. Што сталася з яйкамі голуба, мы дакладна не ведаем, але здагадацца не складана.

Неспадзявана атрымалася адзначыць у Маларыце яшчэ адну пару сакалоў. У адрозненне ад тыповай “гарадской”, гэтая абрала месцам для гнязда закінутую пабудову гракоў у адным з двароў. За птушкамі можна было лёгка назіраць з чацвёртага і пятага паверхаў будынка насупраць.

Паляваць абедзве пары пустэльг лётаюць за горад на палі і лугі, у харчаванні адзначаны палёўкі. Па нашых назіраннях, вельмі важна, каб побач з месцамі гнездавання знаходзіліся сенакосныя палеткі. Па-над бязмежнымі палямі кукурузы пустальга паляваць не стане.

Дзякуючы дапамозе кіраўніка раённай інспекцыі прыродных рэсурсаў і аховы навакольнага асяроддзя Анатоля Нікіцюка і дырэктара гарадскога ЖКХ Рамана Рачкевіча атрымалася своечасова атрымаць доступ на тэхнічны паверх, а таксама арганізаваць кран-вышку, каб закальцаваць птушанят рэдкай для Маларытчыны пустальгі.

Вось так арнітолаг дабіраўся да гнязда, каб акальцаваць птушанят пустальгі. Фота Юрыя Янкевіча

Кольцы ад дасведчаных арнітолагаў Дзяніса Кіцеля, Дзяніса Піпко і Юрыя Янкевіча атрымалі 6 птушанят з нішы на будынку і 4 з гнязда грака.

Птушаняты пустальгі. Фота Дзяніса Піпко

Хочацца верыць, што такі прыклад узаемадзеяння НДА і дзяржаўных устаноў Маларыты будзе і надалей прыносіць карысць рэдкім прадстаўнікам біяразнастайнасці.

Каб такіх ініцыятыў было больш, падтрымай РГСС, пералічыўшы ахвяраванне на рахунак BY70BPSB31351049261149330000. УНП: 101546170. БИК BPSBBY2X.

Увага! Пазначай правільна прызначэнне плацяжу: “ахвяраванне”, па-руску – “пожертвование”. Інакш мы не зможам скарыстацца гэтымі сродкамі.

Ахвяраванне можна пераказаць толькі праз пошту і (або) банк. Да АРІП гэты рахунак не падключаны.

Звяртаем увагу, што гэта спецыяльны рахунак АПБ, які адрозніваецца ад агульнага рахунка на ахвяраванні.

Тэкст, фота: Дзяніс Кіцель