У Беларусі выходзяць сакаліныя маркі

ад 6 ліпеня 2021 года

7 ліпеня Міністэрства сувязі і інфарматызацыі Рэспублікі Беларусь у супрацоўніцтве з АПБ выпускае ў абарачэнне шэсць паштовых марак на тэму «Сокалы» з серыі «Птушкі Беларусі». Адпраў ліст сябрам або папоўні калекцыю!

Над маркамі працавалі мастак і арнітолаг Аляксандр Міцянін і дызайнер Марына Віткоўская

 

Цісні на кнопку, каб падпісацца на ютуб АПБ!

На палях марачных і малога лістоў, а таксама на купонах – лагатып АПБ.

У Беларусі сустракаюцца 6 відаў сокалаў. Тры віды з іх, у якіх самцы добра адрозніваюцца ад самак, апынуліся на марках серыі. Усе гэтыя віды сокалаў уключаны ў Чырвоную кнігу. Акрамя хуткай рэакцыі, з характэрных рыс можна адзначыць, што сокалы зусім не ўмеюць будаваць гнёзд і залежаць тут ад іншых птушак ці дапамогі чалавека.

Кожнаму віду прысвечаны дзве маркі: асобна самцу і самцы. У невялікіх сокалаў апярэнне адносна яркае, у кожнага віду адмысловы сілуэт.

Марка з сокалам-дрымлюком

Марка з сокалам-дрымлюком

Сокал-дрымлюк — рэдкі на гнездаванні ў Беларусі і аддае перавагу паўночным раёнам, аднак падчас міграцыі і зімоўкі птушак сустракаюць па ўсёй краіне. У самцоў адметная папялістая галава і спіна ў адрозненне ад самак і маладых птушак.

Марка з сокалам-пустальгой

Марка з сокалам-пустальгой

Сокал-пустальга ўжо 40 гадоў паспяхова асвойвае беларускія гарады, дзе займае нішы ў вышынных будынках. Колькасць птушак хутка расце. Птушкі на паляванні часценька завісаюць у адной кропцы. Самцы адрозніваюцца ад самак і маладых птушак папялістай афарбоўкай галавы і хваста.

Марка з сокалам-шулёнкам

Марка з сокалам-шулёнкам

Сокал-шулёнак адзіны від з трох, які больш не гняздуе ў Беларусі. Раней сокалы-шулёнкі утваралі тут нават калоніі з дзясяткаў пар, аднак сёння гэты від можна сустрэць у нас толькі падчас міграцыі. Шулёнкі – самыя яркія з усіх нашых сокалаў, бо самцы маюць прыгожы чорны колер, які добра кантрастуе з чырвонымі лапамі.

Аляксандр Вінчэўскі, дырэктар АПБ:

Амаль усе 20 гадоў, якія АПБ супрацоўнічае з Белпоштай, я ўспамінаў польскую серыю 1974 года з шасцю відамі сокалаў, якая з дзяцінства знаходзіцца ў маёй калекцыі. Прыгожыя птушкі і маркі. Вельмі хацелася, каб у Беларусі выпусцілі нешта падобнае. Дзякуй мастакам і кіраўнікам, дзякуючы якім беларускія маркі з сокаламі нарэшце сталі рэальнымі.

Гашэнне "Першы дзень"

Гашэнне «Першы дзень»

7 ліпеня на Галоўным паштамце ў Мінску адбудзецца спецыяльнае гашэнне “Першы дзень”.

На кожным марачным аркушы па пяць аднолькавых марак і адзін купон з птушкай таго ж віду, але супрацьлеглага полу. На малым аркушы – па адной марцы кожнага віду. Наклад кожнай маркі – 40 тысяч асобнікаў.

Маркі з беларускімі сокаламі

Маркі з беларускімі сокаламі

Маркі маюць намінал “А” (перасылка простых лістоў масай да 20 г па Беларусі), “N” (міжнародная перасылка простай непрыярытэтнай паштоўкі), “M” (перасылка за мяжу простай прыярытэтнай паштоўкі), намінал “Р”, (перасылку міжнароднай прыярытэтнай простай пісьмовай карэспандэнцыі (лістоў, бандэроляў, дробных пакетаў) масай да 20 г уключна), і “Н” (перасылка за мяжу непрыярытэтных лістоў, бандэроляў, дробных пакетаў масай да 20 г уключна).

Тэкст: Алеся Башарымаваhttps://www.facebook.com/APB.BirdLife.Belarus/

 



Падзяліся артыкулам у сацсетках:


Сообщить об опечатке

Текст, который будет отправлен нашим редакторам: