На абласным адукацыйным сэмінары ў Горадні сябры АПБ дзяліліся пасьпяховым досьведам дзейнасьці

Навіна аддзяленняў ад 4 красавіка 2007 года

4 красавіка адбыўся сэмінар-практыкум “Разьвіцьцё здольнасьцяў навучэнцаў да дасьледчай і досьледнай працы”, арганізаваны Ўпраўленьнем адукацыі Гродзенскага аблвыканкама і Гродзенскім дзяржаўным аграрным ўнівэрсытэтам на базе апошняга. На яго былі запрошаны прадстаўнікі дзяржаўных установаў з ўсіх раёнаў Гродзенскай вобласьці і абласнога цэнтру, якія займаюцца арганізацыяй дасьледчай працы навучэнцаў.

Прыемна адзначыць, што з 9 выступоўцаў, якім папярэдне былі замоўленыя даклады і прэзэнтацыі, тры чалавекі прадстаўлялі акрамя дзяржаўнай установы яшчэ і АПБ, і распавялі аб сваёй супрацы з ёй.

Гэты былі Віталь Гуменны (сябра Рады Гродзенскага абласнога аддзяленьня АПБ), Аляксандр Ясевіч (сябра АПБ са Смаргоні) і Натальля Белуш (сябра Рады Наваградзкага раённага аддзяленьня АПБ). Акрамя іх, пра АПБ, мэтодыку дасьледваньняў на “Дзікіх квадратах” і праект ТАСІС расказаў прысутным Дзьмітры Вінчэўскі (старшыня Рады Гродзенскага абласнога аддзяленьня АПБ).

Прадстаўнікам раёнаў былі раздадзены кнігі “Зачем нужны заповедники…”, плакаты і іншая прадукцыя “Аховы птушак”, падрыхтаваная ў рамках праекту ТАСІС “Укараненне вопыту Еўрасаюза па зберажэнню запаведнікаў і заказнікаў разам з мясцовым насельніцтвам і ўладамі» .

Спадзяемся, што пасьпяховы досьвед супрацы дзяржаўных адукацыйных устаноў з нашай арганізацыяй зможа дапамагчы і ў актывізацыі падтрымкі навучэнцаў, якія ўжо займаюцца ці яшчэ будуць займацца дасьледчай дзейнасьцю.

Дзякуем Натальлі Машанавай, кіраўніку аддзела ВНУ і ССУЗ упраўленьня адукацыі Гродзенскага аблвыканкама, за запрашэньне на сэмінар.

На здымку Дзьмітрыя Вінчэўскага: на сэмінары выступае Натальля Белуш (АПБ, Наваградак).