Восеньскія назіранні птушак на Берасцейшчыне

Навіна аддзяленняў ад 10 кастрычніка 2007 года

Мінулыя выходныя сябры АПБ з Заходне-Палескага рэгіянальнага аддзялення як і тысячы іншых аматараў птушак — дзетак і дарослых, правялі, назіраючы за нашымі крылатымі сябрамі — птушкамі. У Восеньскіх назіраннях птушак-2007 на Берасцейшчыне прынялі ўдзел больш за 130 чалавек: настаўнікі і вучні, студэнты і навукоўцы, ўсе разам назіралі птушак, насалоджваліся добрым восеньскім надвор’ем.

І хаця птушак было адзначана не так шмат, усяго каля 50 відаў, нас не абмінулі цікавыя сустрэчы. Так, пад час экскурсіі па Брэсцкай крэпасьці ўдалося убачыць малую чайку і пачуць зімародка. Дзяніс Кіцель і Алег Кальчанка пад час экскурсій ў розных месцах, разам з дзеткамі назіралі і нават чулі еўрапейскіх юркоў, птушак якія ужо даўно павінны былі адляцець ў вырай. Зараз больш верагодна адзначыць звычайнага юрка, якога дарэчы таксама бачылі пад час назіранняў, чым еўрапейскага. Найбольшую колькасць экскурсантаў арганізаваў Алег Кальчанка з Кобрына. Ён правёў экскурсію адразу для трох 8-х класаў адной са школ. Групе пад кіраўніцтвам Віктара Ліхвана на ачышчальных сажалках г.Кобрына ўдалося назіраць адну з самых рэдкіх птушак Беларусі – белавокага нырка. Сябры аддзялення пад кіраўніцтвам Сяргея Абрамчука былі на экскурсіі ў ваколіцах балота Ельня (Віцебшчына), дзе сярод іншага адзначылі чараду з прыкладна тысячы шэрых жураўлёў. Вадзім Пракапчук арганізаваў экскурсію для дзетак з Лунінеччыны.

Сябры аддзялення віталі восень ў Брэсце, Кобрыне, Дывіне, Маларыце, Страдзечах, Заказанцы, Олтушы, Лунінцы, на балоце Ельня і ў іншых месцах нашай краіны – разам, для птушак і людзей!

Андрэй Абрамчук, Заходне-Палескае рэгіянальнае аддзяленне АПБ