Як стаць шчыгелам? Вынікі конкурса “Птушка-арт”

Навіна аддзяленняў ад 8 чэрвеня 2018 года

У Сусветны дзень навакольнага асяроддзя ў Беларусі можна было пабачыць незвычайных шчыгелаў. Расказваем, як прайшоў конкурс-флэшмоб “Птушка-арт”.

480 дзяўчат і хлопцаў выйшлі 5 чэрвеня на вуліцы і падворкі, каб адзначыць свята і скласці цікавыя вобразы птушкі года. Дзеці аб’ядналіся ў каманды і на нейкі час ператварыліся ў непаўторных шчыгелаў.

Нам даслалі многа фота – усе яны выявіліся цікавымі і арыгінальнымі. Кожны вобраз шчыгела быў па-свойму ўнікальны. Кіраўнікі дапамаглі як найлепш выявіць моцныя бакі кожнага дзіцяці.

Выбраць пераможцу было цяжка. Мы вырашылі не вылучаць месцаў, а толькі адзначыць тры работы ў пэўных намінацыях.

За самую вялікую колькасць удзельнікаў мы адзначылі каманду сярэдняй школы № 3 Асіповічаў і экалагічнага моладзевага грамадскага аб’яднання “Дзеля жыцця на Зямлі”. 95 удзельнікаў далучыліся да флэшмоба!

За самае нестандартнае фота мы адзначылі  сацыяльна- культурную ўстанову сямейнага развіцця і творчасці «Воображариум». Удзельнікі прынялі цікавае рашэнне і абралі нестандартны падыход, каб стварыць вобраз птушкі года.

За самае  высокае біялагічнае падабенства мы адзначылі Раснянскую сярэднюю школу. Удзельнікі з Камянеччыны пастараліся выявіць не толькі форму птушкі, але і паказаць колерамі сваёй вопраткі адмысловую афарбоўку шчыгела.

Дзякуй усім за ўдзел у конкурсе! Мы радыя, што вас так шмат і што вы такія актыўныя, творчыя і любіце птушак!