Цудоўная чацвёрка

Навіна арганізацыі ад 30 лістапада 2013 года

Чатыры з пяці зязюль па-ранейшаму працягваюць свой шлях, ад Норберта няма ніякіх сігналаў. Мы працягваем сачыць за тым, куды ж ляцяць беларускія зязюлі.

За мінулы тыдзень нашы зязюлі не здзейснілі якіх-небудзь значных пералетаў, і сігналы ад іх ідуць стала. Як і раней, Філ і Віктар застаюцца ў Анголе, у той час як Юлія і Павел трымаюцца ў Мазамбіку і Паўднёва-Афрыканскай Рэспубліцы (ПАР) адпаведна.

Самае далекае падарожжа на гэтым тыдні здзейсніў Філ, праўда, адлегласць яго пералёту складае усяго 100 км. Спачатку ён паляцеў на паўднёвы захад, а пасля змяніў напрамак на 90⁰ і паляцеў на паўднёвы ўсход. Птушка пакінула правінцыю Бенгела і знаходзіцца ў правінцыі Намібэ. Рэльеф мясцовасці значна не змяніўся і ўяўляе сабой невялікія ўзгоркі з асобнымі, даволі высокімі, гарамі. На гэтым тыдні надвор'е тут было камфортнае, невялікія ападкі штодзень і дзённая тэмпература ў межах 20-27 ^оС.

Віктар зараз знаходзіцца на поўначы правінцыі Куненэ і за мінулы тыдзень здзейсніў толькі некалькі кароткіх пералетаў. Надвор'е тут больш спякотнае, днём тэмпература паветра можа дасягаць 35 ^оС, і штодзень выпадае шмат ападкаў.

Павел і Юлія застаюцца на тых жа месцах, што і тыдзень назад: ў правінцыі Лімпапо (ПАР) і правінці Газа (Мазамбік) адпаведна. Хутчэй за ўсё птушкі адпачываюць пасля доўгага пералёту і аднаўляюць свае сілы. Магчыма, яны тут правядуць яшчэ некаторы час, тым больш, што надвор'е спрыяе гэтаму. Тэмпература паветра рэдка падымаецца вышэй 24 ^оС і перыядычна ідуць моцыня дажджы.

Ад Норберта, нажаль, як і раней няма ніякіх сігналаў, але будзем спадзявацца, што астатнія нашы чатыры зязюлі будуць стала слаць сігналы і паспяхова вернуцца ў Беларусь. Сачыце за імі разам з намі!

Сообщить об опечатке

Текст, который будет отправлен нашим редакторам: