Зімовыя ўлікі вадаплаваючых птушак — 2014

Навіна арганізацыі ад 31 студзеня 2014 года

Шаноўныя сябры!

Запрашаем вас прыняць удзел у штогадовай акцыі грамадскай арганізацыі "Ахова птушак Бацькаўшчыны" — "Зімовыя ўлікі вадаплаваючых птушак 2014". Звычайна акцыя ладзіцца цягам студзеня, але ў гэтым годзе з-за цёплага надвор’я ў пачатку года ўсе вадаёмы не мелі льда і праводзіць улікі не было сэнсу. Таму зараз, калі засталося мала незамёрзлых вадаёмаў і птушкі згрупаваныя на іх, самы час правесці ўлікі.

"Зімовыя ўлікі вадаплаваючых птушак 2014" працягнуцца да 17 лютага. Атрыманыя дадзеныя вы можаце дасылаць да 20 лютага. Але калі ў вас ёсць інфармацыя пра назіранні за вадаплаваючымі птушкамі за апошнія два тыдні — таксама дашліце яе.

Каб прыняць удзел у акцыі, вам неабходна:

1. Абраць найбольш зручную для вас дату ў тэрмін з 17 студзеня па 17 лютага.
2. Абраць месца, дзе ёсць вадаёмы з адкрытай вадой.
3. Падрыхтаваць блакнот і ручку, вельмі добра, калі ў вас ёсць бінокль ці вызначальнік птушак.
4. Падчас улікаў падлічыць колькасць птушак, вызначыць іх від, таксама запісаць тых, каго вы не змаглі вызначыць.
5. Паведаміць нам аб выніках сваіх назіранняў наступным чынам:

• праз онлайн-форму на сайце;
• на e-mail info@ptushki.org;
• праз нашы групы ў Facebook ці Vkontakte.

Ваш удзел у акцыі дае магчымасць выявіць цікавыя факты зімоўкі розных відаў птушак. Сярод назіральнікаў будуць разыграныя значкі з выявамі вадаплаваючых птушак.

Паліна Федарава, Сямён Левы