Вынікі конкурса малюнка на асфальце «Як зязюля з Афрыкі вярталася»

Навіна арганізацыі ад 9 чэрвеня 2014 года

5 чэрвеня, у Сусветны дзень навакольнага асяроддзя, мы прапанавалі дзеткам паўдзельнічаць у конкурсе малюнка на асфальце "Як зязюля з Афрыкі вярталася".

Адначасова школьнікі з ўсёй краіны на працягу дня спрабавалі паказаць з дапамогай крэйды, асфальта і ўласнай фантазіі, як яны бачаць шлях вяртання зязюлі звычайнай з Афрыкі на Радзіму.

Конкурс аб’яднаў навучэнцаў рознага ўзросту. Не зважаючы на здольнасці ў маляванні,
кожная праца атрымалася прыгожай і непаўторнай.

Па колькасці ўдзельнікаў і масштабу малюнка бясспрэчна перамог клуб "Крылаты дазор" СШ №9 г. Слуцка пад кіраўніцтвам Жанны Валетка. Каля 57 дзяцей і дарослых малявалі складаны шлях вяртання зязюлі з Афрыкі!

Па арыгінальнасці задумы і цудоўнаму выкананню першае месца заняў школьны лагер "Горад ЭНСК" на базе СШ № 3 г. Ашмяны, кіраўнікі Місуна Е.Ю. і Слуцкая Н.А.

Зязюля ў іх атрымалася сапраўднай падрыхтаванай вандроўшчыцай — у капялюшы і з чамаданам, мабыць, поўным афрыканскіх сувеніраў.

Больш за 150 фота мы атрымалі ў гэтым годзе на паштовую скрыню кампаніі "Зязюля –птушка 2014 года".  Каля 300 чалавек прынялі ўдзел у акцыі 5 чэрвеня.

Удзельнікі і пераможцы конкурса атрымаюць  памятныя прызы ад АПБ.

Вялікі дзякуй усім удзельнікам за цікавыя і прыгожыя малюнкі. Сябры, спадзяемся, з дапамогай конкурса малюнка на асфальце "Як зязюля з Афрыкі вярталася" вы сапраўды адчулі, што  лета – выдатны час атрымліваць асалоду ад гульняў на прыродзе,  творчых заняткаў, назіранняў за птушкамі і прыродай!


Карына Салавей, супрацоўнік па акцыях і кампаніях АПБ
salavei@ptushki.org