Сябра АПБ нумар 7000!

Навіна арганізацыі ад 18 верасня 2017 года

Усё больш людзей у вялікай сям'і АПБ: каму дастаўся ганаровы нумар сябра № 7000? 

Наш восеньскі “ураджай” – гэта сябра арганізыцыі пад нумарам 7 000! Пад такой лічбай да АПБ далучылася Галіна Паўлыга: вось дык пашчасціла! Як месца працы Галіна пазначыла “Завадскі раённы аддзел па надзвычайных сітуацыях г. Минска”. Мы звязаліся з сябрам №7000, каб спытаць, чаму яна вырашыла далучыцца да АПБ. Размова выдалася цікавай. 

— Насамрэч я даўно хацела далучыцца да “Аховы птушак”! Ужо можа год пяць, ці нават болей… Але нешта рукі не даходзілі. І вось вырашыла: трэба зараз! І, бачыце, абрала такі час, што стала нумарам 7 000, — смяецца Галіна.

Але што стала нагодай для супрацоўніцы МНС стаць сябрам прыродаахоўнай арганізацыі і аплаціць сяброўскі ўзнос? Насамрэч у дзяўчыны біялагічная адукацыя. Больш таго – яна выпускніца 2012 года па спецыяльнасці “арніталогія”. Таму птушкі для яе – даўнія знаёмыя. 

— Так сталася, што па спецыяльнасці я не працую, і маё жыццё не звязана з птушкамі. Але мне яны падабаюцца. Асабліва – шэры жураўль. Вельмі грацыёзная і незвычайная для Беларусі птушка. І мне хочацца дапамагаць у справе аховы птушак. Сваім сяброўскім узносам. Таксама хачу дапамагаць і валанцёрскі. Апошняе мерапрыемтсва АПБ, якое я наведала, гэта “Ноч кажаноў” у дворыку музея. Мне вельмі спадабалася. Цікавая інфармацыя, добры фармат. Хочацца больш такіх мерапрыемстваў на працягу года! 

Вітаем Галіну ў “птушынай” сям’і і запрашаем далучацца да АПБ тых, хто таксама даўно хацеў,  але “рукі не даходзілі”! Сяброўства ў арганізацыі для вас – гэта магчымасць сваім узносам дапамагаць дзікай прыродзе Беларусі, а для нас – магчымасць звяртацца да іншых ад імя тысяч нашых сябраў. Больш, больш сябраў АПБ!

Даведка: 

• Як стаць сябрам АПБ
• Як аплаціць сяброўскі ўзнос