Беларусь гатова сустрэць птушыны грып?

Навіна арганізацыі ад 21 лютага 2007 года

Пад час прэс-канфэрэнцыі ў Менску начальнік галоўнага ўпраўленьня вэтэрынарыі Мінсельгасхарчу Аляксандр Аксёнаў зазначыў, што ў Беларусі распрацаваны Комплексны плян мерапрыемстваў па прафіляктыцы птушынага грыпу на 2007 г. Мерапрыемствы ў першую чаргу скіраваныя на папярэджаньне заносу вірусу на тэрыторыю Беларусі. Паколькі найбольш імаверным кірункам заносу інфэкцыі зьяўляецца поўдзень краіны, там працягнуць дзейнасьць адмысловыя станцыі адсочваньня, што працуюць ад 2003 г. Над асаблівым “наглядам” апынуцца Сож і Прыпяць. Беларускія птушкафабрыкі — а іх у нас 78 — ужо другі год працуюць у зачыненым рэжыме. Пэрсанал гэтых прадпрыемстваў атрымлівае бясплатныя прышчэпкі ад звычайнага вірусу грыпу. На птушкафабрыках дзейнічаюць санітарныя бар’еры. У выпадку фіксацыі хоць бы аднаго захворваньня птушкі прадугледжваецца зьнішчэньне і ўтылізацыя ўсяго пагалоўя. Плян мерапрыемстваў па ахове свойскай птушкі прадугледжвае вакцынацыю птушкі, што гадуецца ў непасрэднай блізкасьці ад птушкафабрыкаў, а таксама ізаляцыя свойскай птушкі на час міграцыі дзікай. Сёлета такія захады будуць задзейнічаныя ад 1 красавіка. Летась была зробленая вакцынацыя 6 мільёнаў птушак, сёлета плянуецца яшчэ 3 мільёны. Усяго для набыцьця пажыцьцёвага імунітэту птушцы неабходна зрабіць дзьве прышчэпкі. Кошт адной прышчэпкі складае 80 цэнтаў ЗША. Маніторынг працэсаў, зьвязаных зь дзейнасьцю айчынных птушкафабрыкаў, завозам імпартнай птушкі і кармоў, абышоўся беларускаму бюджэту ў мінулым годзе ў 240 мільёнаў беларускіх рублёў. Прадукцыя беларускіх птушкафабрыкаў ад мінулага году выпускаецца выключна ў запакаваным выглядзе, з нанясеньнем на ўпакоўку неабходных зьвестак. Па інфармацыі Міністэрства аховы здароў, атрыманай ад расейскіх калегаў, вірус птушынага грыпу, зафіксаваны ў Маскоўскай вобласьці, не ўяўляе пагрозы чалавеку. Тым не менш, пастаўкі расейскай мясной прадукцыі, вырабленай з птушкі, часова абмежаваныя. Адначасова Расея зрабіла Беларусі падарунак у выглядзе бясплатнай дапамогі: беларускім навукоўцам перададзенае лябараторнае абсталяваньне на мільён даляраў ЗША. Беларускія мэдыкі маюць неабходныя прэпараты на выпадак перадачы віруса птушынага грыпу ад птушкі чалавеку. У кожным інфэкцыйным аддзяленьні зарэзэрваваныя ізаляваныя памяшканьні і падрыхтаванае неабходнае абсталяваньне. Падрыхтаваныя лекавыя сродкі для аказаньня дапамогі ня менш чым 5 пацыентам на раённым і 20 – на абласным узроўні. Паводле зьвестак Сусьветнай арганізацыі аховы здароўя ад 2003 г. зафіксавана 272 выпадкі захворваньня, выкліканага вірусам А (H5N1), зь іх 166 выпадкаў скончыліся сьмерцю. На сёньня захворваньне птушак зафіксаванае ў 59 краінах сьвету. Скарочана, паводле: Сямён Печанко , www . nn . by 20 лютага 2007 г. Здымак з www.duke.usak.ca Больш падрабязна пра апошнія выпадкі захворваньняў птушыным грыпам у Заходняй Эўропе можна прачытаць на расейскай мове тут: http:// www . svobodanews . ru / Article /2007/02/09/20070209120115750. html пра птушыны грып у Расеі і апошнія тэндэнцыі па распаўсюджаньню хваробы тут:

http://www.svobodanews.ru/Article/2007/02/19/20070219123348967.html