Рэкорд малога грыцука па хуткасці пералёту

Навіна арганізацыі ад 5 красавіка 2007 года

Малы грыцук (Limosa lapponica), на якім быў замацаваны спадарожнікавы перадатчык, “паставіў” новы рэкорд па хуткасьці пералёту на вялікую адлегласць. Гэты кулік праляцеў з Паўночнага вострава Новай Зеландыі ў Yalu Jiang (Кітай, на паўночным ускрайку Жоўтага мора) – усяго 10 200 км. Палёт заняў толькі 9 дзён. Пра гэта паведаміла каманда навукоўцаў з праекту вывучэння міграцыі ціхаакіянскіх прыбярэжных птушак (Pacific Shorebird Migration Project), якія назіралі за пералётам гэтай птушкі.

Папярэдняе даследванне зарэгістравала вельмі адлеглы пералёт іншага малога грыцука на поўдзень, са спадарожным ветрам, з Аляскі ў Новую Зеландыю і Аўстралію. Новы вынік паказаў магчымасьці палёту гэтых кулікоў без спрыяльных ветраў і ў паўночным накірунку.

Спецыялісты па ахове прыроды падкрэсліваюць значнасць даследванняў, зробленых з дапамогай спадарожнікавых перадатчыкаў для аховы мігрыруючых птушак.

“Сачэнне з дапамогай спадарожнікаў — важны інструмент, які дапамагае нам больш даведацца пра сапраўды дзівосныя падарожжы птушак і небяспекі, якія могуць іх чакаць пад час пералётаў” – сказаў Вікі Джоўнс ( Vicky Jones ), супрацоўнік BirdLife па міграцыям птушак. “Наша адказнасць зараз у тым, каб эфектыўна выкарыстаць гэтыя веды для забяспячэння аховы мігрыруючых птушак пад час іх пералётаў. Гэта значыць, што мы зможам ахоўваць папуляцыі не толькі на месцах гнездавання і зімоўкі, але і на самых важных прыпынках, якія птушкі робяць пад час сваіх падарожжаў”.

Ахова такіх месцаў застаецца самай цяжкай задачай. Змены, якія нясе з сабой чалавек – асабліва забруджванне і асушэнне – на забалочаных тэрыторыях уздоўж шляхоў міграцыі птушак, паводле апошніх звестак, адказнае за скарачэнне папуляцый многіх водна-балотных відаў птушак па ўсім Свеце.

Прыбярэжныя балоты Кітайскага Жоўтага мора – тыя, куды прыляцеў малы грыцук з перадатчыкам на спіне, — на жаль, не з’яўляюцца выключэннем. Вялікія тэрыторыі ўзбярэжжа працягваюць змяняць сваю функцыю і выкарыстоўваюцца пад сельскую гаспадарку, прамысловасць, пабудову жыльля і іншых будынкаў – па сучасных ацэнках прыкладна 37% такіх зямель было страчана з 1950г. Марскія акваторыі жыццёва важныя для водных відаў птушак. Дагэтуль BirdLife вызначыла 16 ТВП (тэрыторый, важных для птушак) у гэтым рэгіёне, каб захаваць найбольш важныя месцы гнездавання, зімоўкі і міграцый.

Даследванне малых грыцукоў з дапамогай спадарожнікавых перадатчыкаў адбываецца як частка праекту Pacific Shorebird Migration , у ім удзельнічаюць Геалагічная разведка ЗША ( US Geological Survey ) з Анкорыджу на Алясцы, Станцыя назіранняў за птушкамі Point Reyes Bird Observatory ў Пэталуме, Каліфорнія, разам з камандамі навукоўцаў у Новай Зеландыі і на Юконе.

Каб пагладзець пералёты малага грыцука, click here

05-04-2007

Крыніца: www. birdlife. org

Пераклаў Дзьмітры Вінчэўскі (АПБ)

На здымку Mike Danzenbaker ‘а з www. avesphoto. com – малады малы грыцук ( Limosa lapponica ).

Малыя грыцукі пад час міграцыі зрэдку адзначаюцца на тэрыторыі Беларусі.