Басрская чаротаўка вярнулася ў … Ізраіль!

Навіна арганізацыі ад 23 жніўня 2007 года

Існаванне адзінай, вядомай па-за межамі Іраку гняздуючай папуляцыі басрскай чаротаўкі (Basra Reed-warbler) было пацверджана сябрамі грамадзкай арганізацыі SPNI (BirdLife у Ізраілі). Пасля адкрыцця ў мінулым годзе чатырох асобін гэтага віду ў пойме Гулы (Hula Valley) ў Ізраілі, сёлета SPNI анансавала вяртанне трох з гэтых акальцаваных чаротавак разам з адной неакальцаванай – гэта надзейны доказ гнездавання гэтага віду ў Ізраілі.

“Адметна, што ўсе тры закальцаваныя ў мінулым годзе дарослыя птушкі вярнуліся ў тое самае месца пасля зімоўкі недзе ва Ўсходняй Афрыцы” – сказаў Ітаі Шанні ( Itai Shanni ), прадстаўнік SPNI . Пасля гэтага яшчэ некалькі птушак разам з адным птушанём назіраліся ў гэтым жа месцы.

Басрская чаротаўка – гняздуючая птушка балот Месапатаміі ў Паўднёвым Іраку, і, магчыма, у Паўднёва-Заходнім Іране. Яе колькасць даволі хутка знізілася з-за асушэння балот, якое, на жаль, працягваецца . І хаця цяпер вялікія тэрыторыі іракскіх балот зноў запоўнены вадой, від застаецца ў Міжнародным Чырвоным спісе ў катэгорыі пагражаемых ( Endangered ).

SPNI зараз пачынае даследаванні іншых магчымых месцаў гнездавання віду – між іншым, на прыватных рыбаразводных сажалках каля воз.Агмон, каб, пры неабходнасці, надаць ім адпаведны статус аховы.

22-08-2007

Крыніца: www. birdlife. org

Пераклаў Дзьмітры Вінчэўскі (АПБ)

Здымак A F A Hawkins/BirdLife