“У Жалудку адбылася падзея еўрапейскага маштабу”

Навіна арганізацыі ад 19 лістапада 2007 года

Дзякуючы паспяховай супрацы і ахвярнасці сябраў АПБ з усёй Беларусі і ксяндзу-пробашчу Жалудоцкага парафіяльнага касцёла а. Яну Рэйшалю, на сцяне гэтай святыні ў нядзелю, 18 лістапада 2007г., была ўрачыста адкрыта памятная шыльда заснавальніку беларускай орніталогіі графу Канстанціну Тызенгаўзу (1786-1853).

[SCREEN:1] На працягу дзвюх апошніх гадоў сябры нашай арганізацыі рабілі ахвяраванні на выраб і размяшчэнне гэтага знаку павагі да вялікага орнітолага. Вядомы беларускі мастак і дызайнер Ігар Варкулевіч бясплатна зрабіў шкіц памятнай шыльды, Ардынарый-біскуп Гродзенскай дыяцэзіі Аляксандр Кашкевіч даў дазвол на яе ўсталяванне на касцёле Ўнебаўзяцця Найсвяцейшай Панны Марыі ў Жалудку – мястэчку на Шчучыншчыне, дзе Канстанцін Тызенгаўз 221 год таму нарадзіўся і ў сямейным склепе пад якім быў пахаваны. Дзякуючы дапамозе нашага польскага калегі Дамініка Крупіньскага з прыродаахоўнага таварыства “ Bocian ” атрымалася зрабіць шыльду такой, якой яе задумаў мастак. Сябры АПБ з Гарадзеншчыны Яўген Вінчэўскі і Павел Краўчук прымацавалі яе на сцяне касцёлу.

[SCREEN:0] Сёння ж, пасля нядзельнай Святой Імшы ў Жалудоцкім касцёле, ксёндз-пробашч а.Ян Рэйшаль у прысутнасці прыкладна двух соцень мясцовых жыхароў, гасцей урачыстасці з усёй Беларусі, журналістаў з Горадні і Мінску, адкрыў памятную шыльду і асвяціў яе. Пасля гэтага, з ласкавага дазволу ксяндза, сябры АПБ Васіль Грычык (Мінск) і Дзьмітры Вінчэўскі (Горадня), ў памяшканні касцёла зрабілі дзве навукова-папулярныя прэзентацыі пра жыццё і дзейнасць нашага славутага земляка і пра род Тызенгаўзаў.

[SCREEN:2] Урачыстасць працягнулася ў мясцовай сталовай, дзе і прагучала меркаванне вядомага гарадзенскага краязнаўцы Алеся Госцева, якое вынесена ў назву артыкулу: “Сёння ў Жалудку адбылася падзея еўрапейскага маштабу”.

Аднак акрамя высокіх ацэнак зробленага, прагучалі і заклікі прыкладаць больш намаганняў, каб мы раслі на сваёй зямлі свядомымі нашчадкамі тых, хто нам яе пакінуў у спадчыну.

Скончылася падзея экскурсіяй ў Жалудоцкі палац Святаполкаў-Чацвяртынскіх – пераемнікаў Тызенгаўзаў у гэтым мястэчку.

[SCREEN:3] Шчыра дзякуем усім, хто дапамог у стварэнні і размяшчэнні шыльды, у арганізацыі і правядзенні ўрачыстасці, усім, хто знайшоў час і магчымасць далучыцца да арганізаванай праз АПБ паездкі, а таксама за дапамогу ў яе арганізацыі з боку Швэдзкага орніталагічнага таварыства SOF – без яе такі масавы ўдзел сябраў АПБ ва ўрачыстасці быў бы немагчымы.

18-11-2007

Дзьмітры Вінчэўскі, Гродзенскае абласное аддзяленне АПБ, Горадня

Здымкі Алены Вінчэўскай (АПБ) . Іншыя здымкі з падрыхтоўкі і менавіта самой урачыстасці гл. тут:

http://www.ptushki.org/index.php?nav=1&p=gallery&action=showimages&galid=50&area=1&pp=12&ascdesc=desc&page=1

Артыкул пра гісторыю роду Тызенгаўзаў, а таксама пра жыццё і дзейнасць Канстанціна Тызенгаўза можна зпампаваць тут: www. portal . grsu . by / portal / downloads / REFERATS / BIO / full — story . doc

Паглядзець на здымкі мясцін, звязаных з імем нашага знакамітага земляка, можна тут: http://ptushki.org/index.php?area=1&p=gallery&action=showimages&galid=25

Іншыя матэрыялы, прысвечаныя К.Тызенгаўзу, на нашым сайце можна паглядзець тут:

http://www.ptushki.org/index.php?p=news&area=1&newsid=255

http://www.ptushki.org/index.php?p=news&area=1&newsid=385