У Клічаве з’явілася графіці з сойкай

Апошнія навіны,Навіна арганізацыі ад 7 верасня 2018 года

графіці птушка раёна

Выява запаслівай птушкі з’явілася на фасадзе жылога дома па вуліцы Крываноса, 4. Птушак на гарадскіх мурах усё больш!

Мастак Алесь Kontra чараваў над муралам чатыры дні. І калі першай спробе мастака перашкодзілі дажджы, то гэтым разам надвор’е было надзвычай добрым. Калі ў Мінску зрабілася пахмурна і вільготна, у Клічаве было сонечна і спякотна.

Гэта не першая птушка ў калекцыі графіці мастака. Ён намаляваў вушатую саву і гогаля ў Мінску, зімародка з Валожыне і жаўрука-смецюха ў Маларыце.

Алесь Kontra, мастак

Рэакцыя ў людзей, як гэта звычайна бывае, была рознай. Нехта казаў яшчэ ў першы дзень, калі былі толькі контуры, што файная птушка і г. д. Нехта кожны дзень прыходзіў і пытаўся, ці скончана ўжо? Так бывае пастаянна. Быў нават адзін «ваяўніча» настроены мужчына, жыхар дома, на якім месціўся мурал, які пытаў, а навошта гэты “верабей” нам. А калі праца была ўжо скончаная, сказаў: “Ну цяперака файна, канешне, што сказаць”. «Добры саёк» атрымаўся, па ягоных словах. 🙂 А так з большага жыхары і мінакі былі задаволеныя. Гэта магу з упэўненасцю сказаць, бо Клічаў і падобныя яму гарадкі зусім не “разбэшчаныя» мураламі мейсцы. Таму людзі спачатку з цікавасцю і непаразуменнем ставяцца да такога роду інтэрвенцый. Але потым думка мяняецца на пазітыўную. Ад мяне Асабісты Дзякуй усім арганізатарам, уладам горада і асабліва неабыякавым людзям, якія ахвяравалі грошы на гэты мурал. Вы падаравалі не толькі сімвал, але і ўсмешкі жыхароў, якія кожны дзень будуць праходзіць міма фасада з сойкай. Кожнаму гораду — сваю птушку!

Сродкі на партрэт сойкі на доме збіралі талакой. Яшчэ раз дзякуй усім, хто падтрымаў праект на платформе Талака! Прыязджайце ў Клічаў палюбавацца вынікам. Дзякуй раённаму Савету дэпутатаў і ў прыватнасці яго старшыню Уладзіміру Кнігу, а таксама Клічаўскаму ЖКГ і дырэктару гэтага прадпрыемства Андрэю Мацюшонку за спрыянне таму, каб птушка-сімвал раёна з’явілася на фасадзе.

Цяпер жыхары і госці Клічава змогуць любавацца крылатай красуняй і з лёгкасцю пазнаюць яе пры сустрэчы.