Плюсік у карму – шчыгелаў у Карму!

Апошнія навіны,Навіна арганізацыі ад 14 верасня 2018 года

Падтрымай стварэнне мурала з птушкай года! Чародка шчыгелаў паселіцца на сцяне жылога дома ў Карме, што ў Гомельскім раёне.

Чаму тут? Таму што шчыгел абраны птушкай-сімвалам Кармянскага раёна.

Макет мурала са шчыгеламі

Роспіс выканае мастак Алесь  Kontra, на рахунку якога ўжо шмат птушыных графіці. Нядаўна ён намаляваў сойку на доме ў Клічаве. Ёсць яго працы ў Мінску, Валожыне, Маларыце ды Івянцы. Сродкі на муралы мы збіралі талакой – як і цяпер. Дзякуючы ахвярадаўцам усё больш гарадоў упрыгожваюцца птушкамі!

Карына Салавей, кіраўнік аддзела развіцця АПБ

Малым гарадам не хапае яркіх сучасных арт-аб’ектаў — мы разам з вамі можам гэта выправіць. У з’яўленні птушынага графіці ад АПБ не толькі эстэтычны складнік. Гэта добры спосаб прыцягнуць увагу насельніцтва да прыгажосці прыроды Беларусі, да яе разнастайнасці і ўнікальнасці.

Хочаш дапамагчы Карме стаць ярчэйшай і ўшанаваць сваю абранніцу? Намалюй пёрка шчыгелу, зрабіўшы ўнёсак на краўфандынгавай платформе “Талака”.

Макет ужо ёсць, размяшчэнне графіці ўзгодненае з Кармянскім райвыканкамам – засталося толькі сабраць грошы на фарбы, валікі ды пэндзлі і на пад’ёмнік са страхоўкай.

Хай птушкі года аздобяць горад, а кожны жыхар запомніць, як яны выглядаюць, і з лёгкасцю пазнаюць сярод іншых птушак!

ПАДТРЫМАЦЬ ПРАЕКТ “ШЧЫГЕЛ НА ДОМЕ”