7 кастрычніка — VIII Чэмпіянат па фотабёрдынгу ў Брэсце!

Абвестка,Апошнія навіны,Навіна арганізацыі ад 18 верасня 2018 года

Рыхтуй фотаапарат і бадзёры настрой: 7 кастрычніка ў Брэсце будзем лавіць птушыныя кадры. АПБ ладзіць VIII Чэмпіянат па фотабёрдынгу!

Што трэба рабіць?

Фатаграфаваць птушак у натуральным асяроддзі! Як? Вось некалькі парадаў.

А каб перамагчы ў Чэмпіянаце, табе трэба за 5 гадзін — з 9.00 да 14.00 — наздымаць як мага больш розных відаў птушак.

За кожны від табе будуць налічвацца балы. Прычым найбольш балаў за кожны здымак атрымаюць тыя, хто правільна вызначыць від сфатаграфаванай птушкі.

СПАМПАВАЦЬ ПРАВІЛЫ ЧЭМПІЯНАТУ ПА ФОТАБЁРДЫНГУ

Кольчатую туркаўку можна сфатаграфаваць у Брэсце. Фота Ірыны Бірынай-Паўлавай

Як запісацца на Чэмпіянат?

Спампуй форму простай заяўкі, запоўні яе і дашлі на адрас levy@ptushki.org.

Заяўкі прымаюцца да 17.00  пятніцы 5 кастрычніка. 

Ты можаш удзельнічаць індывідуальна або ў камандзе з двух чалавек.

Удзел у Чэмпіянаце бясплатны.

Чэмпіянат па фотабёрдынгу зноў пройдзе ў Брэсце

Па выніках будуць вызначаныя пераможцы і прызёры, таксама асобна будзе абраны найлепшы здымак. Як і на папярэдніх спаборніцтвах, журы можа ўвесці дадатковыя намінацыі і адзначыць яшчэ некалькі цікавых фота або ўдзельнікаў. Пераможцы атрымаюць прызы.

Сямён Левы, каардынатар чэмпіянату

Чэмпіянат па фотабёрдынгу вяртаецца ў Брэст.У 2016 годзе мы ўжо сустракалі фотаанімалістаў з усёй краіны ў Брэсцкай крэпасці. Тады спаборніцтвы былі ўвесну, і ўдзельнікі паставілі рэкорды па колькасці сфатаграфаваных птушак, і гэтыя рэкорды пакуль не пабітыя. Упэўнены, што і гэты, ужо восьмы, чэмпіянат прынясе свае сюрпрызы і цікавыя кадры ў капілкі ўдзельнікаў. Бо Брэст адзін з самых прывабных для птушак гарадоў Беларусі. У спаборніцтвах можна ўдзельнічаць нават з камерай мабільнага тэлефона! Галоўнае – сфатаграфаваць птушку не блізка і прыгожа, а так, каб была бачная хаця б адна характэрная прыкмета віду. І мы абяцаем цікавы маршрут у новым месцы! Які дакладна – абвесцім за тыдзень да старту.

Далучайся да прыгожага і цікавага занятку, знаёмся з птушкамі праз аб’ектыў фотаапарата!

Чэмпіянат па фотабёрдынгу пройдзе ў межах Восеньскіх дзён назірання за птушкамі EuroBirdwatch-2018.

Удзельнікі Чэмпіянату па фотабёрдынгу — 2017, Мінск

Даведка 

Чэмпіянаты па фотабёрдынгу праходзілі ў Мінску чатыры разы, а таксама двойчы ў Гомелі і адзін раз у Брэсце. VIII Чэмпіянат па фотабёрдынгу – адно з мерапрыемстваў ініцыятывы “Будзь здаровы з птушкамі!”, якая рэалізуецца ў межах праекта міжнароднай тэхнічнай дапамогі “Прафілактыка неінфекцыйных захворванняў, прасоўванне здаровага ладу жыцця і падтрымка мадэрнізацыі сістэмы аховы здароўя ў Рэспубліцы Беларусь” (“БЕЛМЕД”), які фінансуецца Еўрапейскім Саюзам і рэалізуецца ПРААН, СААЗ, ЮНІСЕФ і ЮНФПА у парнёрстве з Міністэрствам аховы здароўя Рэспублікі Беларусь.

Цікава 

• Як прайшоў VIІ Чэмпіянат па фотабёрдынгу (вясна 2017, Гомель): пераможцы і намінацыі
• Як прайшоў VІ Чэмпіянат па фотабёрдынгу (восень 2017, Мінск): пераможцы і намінацыі
• Як прайшоў V Чэмпіянат па фотабёрдынгу (восень 2016, Мінск): пераможцы і намінацыі
• Як прайшоў IV Чэмпіянат па фотабёрдынгу (вясна 2016, Брэст): пераможцы  і намінацыі
• Як прайшоў III Чэмпіянат па фотабёрдынгу (восень 2015, Мінск)
• Як прайшоў II Чэмпіянат па фотабёрдынгу (вясна 2015, Гомель)
• Як прайшоў I Чэмпіянат па фотабёрдынгу (восень 2014, Мінск) 

Ініцыятыва рэалізуецца ў межах праекта міжнароднай тэхнічнай дапамогі “Прафілактыка неінфекцыйных захворванняў, прасоўванне здаровага ладу жыцця і падтрымка мадэрнізацыі сістэмы аховы здароўя ў Рэспубліцы Беларусь” (“БЕЛМЕД”), які фінансуецца Еўрапейскім Саюзам і рэалізуецца ПРААН, СААЗ, ЮНІСЕФ і ЮНФПА у парнёрстве з Міністэрствам аховы здароўя Рэспублікі Беларусь.