Каля 100 гектараў балота адноўлена ў заказніку «Спораўскі» шляхам сенакашэння

Навіна арганізацыі ад 15 красавіка 2013 года

Механізаванае сенакашэнне з’яўляецца эфектыўным інструментам захавання біяразнастайнасці нізінных балот. Гэтае мерапрыемства прадугледжана планамі кіравання, у тым ліку і планам кіравання заказнікам “Спораўскі”.

Такія птушкі як вяртлявая чаротаўка, вялікі арлец і дубальт гняздзяцца на балоце Спораўскае. Гэтае балота – другое па значнасці на Беларусі, дзе жыве і гняздзіцца вяртлявая чаротаўка. Дарэчы, толькі ў нашай краіне знаходзіцца 40% сусветнай папуляцыі дадзенага віду. А дубальт і вялікі арлец занесены ў Чырвоную кнігу.

АПБ штогод здзяйсняе сенакашэнні Спораўскага балота. Упершыню касьба праходзіла з кастрычніка 2011 па сакавік 2012 года. Тады было скошана каля 100 гектараў. Гэты год не стаў выключэннем. У 2013 адноўлена яшчэ каля 100 гектараў нізіннага балота. Акрамя сенакашэння на балоце вызначаны ўчасткі для назіранняў за тым, які ўплыў аказвае касьба на папуляцыі птушак і раслін.