Еўрапейскі вугор / Европейский угорь

ад 6 декабря 2019 года

Еўрапейскі вугор – адзіны від з 19 відаў рачных вугроў, вядомых навуцы, які жыве ў дарослым стане ў прэсных вадаёмах Еўропы. У 2008 годзе Міжнародны саюз аховы прыроды і прыродных рэсурсаў уключыў вугра ў Чырвоны спіс як від, што знаходзіцца “на крытычнай мяжы знікнення”.

У Беларусі гэта адзіны від жывёл, які мае такі высокі пагражальны статус. Гэтыя рыбы прыплываюць у Еўропу яшчэ лічынкамі з Саргасавага мора, жывуць тут 5-20 гадоў, а потым плывуць на сваю радзіму нерасціцца першы і апошні раз у сваім жыцці.

Як дапамагчы вугру даплыць на нераст?

Актыўны ўначы, а ўдзень любіць хавацца ў травяністых месцах, пад карчамі, часта закопваецца ў глей на глыбіню да 130 см. Рачныя вугры здольныя па мокрай траве пераадольваць значныя ўчасткі сушы, перабіраючыся з аднаго вадаёма ў другі і апынаючыся такім чынам у бяссцёкавых азёрах.

Европейский угорь

Асноўная пагроза вугру сыходзіць ад чалавека: забруджаныя сцёкавыя воды, ГЭСы без рыбаходаў, прамысловы адлоў, браканьерства, кантрабанда – гэта далёка не поўны спіс прычынаў, якія паставілі еўрапейскага вугра пад пагрозу вымірання.

У 2015 годзе міграцыя маладых вугроў у басейн Паўночнага мора знізілася на 99 % у параўнанні з ўзроўнямі 1960-70-х гадоў. І пры гэтым усім нават у Беларусі вугра да гэтага можна купіць як у крамах, так і ўздоўж дарог у гандляроў рыбай!

Вугор у Беларусі лічыцца асабліва каштоўным прамысловым відам. Права на лоўлю гэтай унікальнай рыбы ёсць толькі ў двух нацыянальных паркаў — «Браслаўскія азёры» і «Нарачанскі», а таксама ў некалькіх прыватнікаў. Паводле прагнозаў навукоўцаў, у нашых вадаёмах апошніх вугроў вылавяць ужо праз пяць гадоў. Ці ёсць сэнс і далей спрыяць знікненню гэтага віду?

Угорь европейский

Угорь европейский. Источник фото: zooclub.org.ua

Каб захаваць еўрапейскага вугра ў Беларусі, АПБ ажыццяўляе першы этап праекта «Захаванне ласосяў і еўрапейскага вугра ў Беларусі», які фінансуецца Шведскім агенцтвам міжнароднага супрацоўніцтва ў галіне развіцця (SIDA) праз Кааліцыю Чыстая Балтыка (Coalition Clean Baltic).

Праект ажыццяўляецца ў беларускай частцы басейна Балтыйскага мора.

 

У будучыні плануецца ў адной са школ Мядзельскага раёна стварыць інфармацыйны цэнтр па захаванні еўрапейскага вугра.

У межах праекта створаная інтэрактыўная «Народная карта распаўсюду еўрапейскага вугра ў Беларусі» на сайце АПБ ptushki.org, у стварэнні якой зможа дапамагчы любы чалавек, які валодае інфармацыяй аб сустрэчах вугра ў вадаёмах Беларусі.

Як дапамагчы праекту?

Кожны чалавек, які хоча захаваць еўрапейскага вугра ў нашых водах, у першую чаргу можа паведаміць як мага большай колькасці людзей пра рэальную пагрозу страціць гэты від назаўжды. У нашых сілах захаваць чысціню нашых вадаёмаў, не купляць вугра ні ў якім выглядзе, змагацца з браканьерствам і спыніць прамысловы вылаў ў Беларусі.

Распытвайце бацькоў і дзядоў пра тое, дзе сустракаліся вугры ў Беларусі, і заносьце гэтыя месцы на карту: ptushki.org /eelfish.

 

 


Падзяліся артыкулам у сацсетках:

Сообщить об опечатке

Текст, который будет отправлен нашим редакторам: